धनगढी, १२ जेठ । नेपाली र भारतीय श्रद्धालुको आस्थाको धरोहर बेहडाबाबा मन्दिरमा गङ्गादशहरा मेला सुरु भएको छ । हरेक वर्ष जेठ महिनाको शुक्लपक्ष दशमी तिथिका दिन गङ्गादशहराको अवसरमा लाग्दै आएको धार्मिक मेला मङ्गलबार राति १२ बजेदेखि सुरु भएको हो । बेहडाबाबा मन्दिरमा रहेको शिवलिङ्गमा राति १२ बजे पूजाआजासहित जल चढाएर मेलाको सुरुवात गर्ने चलन रहिआएको छ ।

कैलालीको धनगढी उपमहानगरपालिका–१६ स्थित जङ्गल क्षेत्रमा रहेको बेहडाबाबा मन्दिरको दर्शनका लागि नेपालीसहित हजारौँ भारतीय दर्शनार्थी आउने गरेका छन् । बेहडाबाबामाथि भारतीय दर्शनार्थीको अगाध श्रद्धा रहेको छ । बेहडाबाबाको दर्शन गरेर शुद्ध मनले मागेका कुरा प्राप्त हुने गरेको भारतीय दर्शनार्थीले बताउने गरेका छन् । बेहडाबाबाको दर्शन गर्दा सुख, शान्ति, समृद्धि र सन्तान प्राप्त हुने गरेको उनीहरूको भनाइ छ ।

बेहडाबाबाको दर्शन र पूजाआजा गरेमा मनोकामना पूरा हुने गरेको भारतको उत्तर प्रदेश खिरीस्थित भिराका सोहनलाल साहुले बताए । “सन्तान नहुनेले बेहडाबाबाको दर्शन गरेमा सन्तान पनि प्राप्त हुने गर्दछ,” बेहडाबाबा जाँदै गर्दा धनगढीमा भेटिएका उनले भने, “बेहडाबाबाको दर्शन र पूजाआजा गर्दा मनोकामना पूरा हुने गरेकाले म विगत केही वर्षदेखि प्रत्येक वर्ष यहाँ गङ्गादशहरामा दर्शन गर्न आउने गरेको छु ।”
जेठको चर्को गर्मीमा पनि भारतीय दर्शनार्थी गौरीफन्टा नाकादेखि बेहडाबाबा मन्दिरसम्म प्रायः हिँडेरै पुग्ने गरेका छन् । झोलाझम्टा, बालबच्चा बोकेर उनीहरू पैदल हिँडेर आएको देखिन्छ । नाकाबाट बेहडाबाबा करिब १२ किलोमिटर टाढा रहेको छ ।
भारतीय श्रद्धालुका लागि मन्दिरपरिसरमा धर्मशाला सञ्चालन गर्दै आएको मन्दिर व्यवस्थापन समितिले जानकारी दिएको छ । समितिका अध्यक्ष खेमबहादुर चन्दले जेठ १२ देखि १५ गतेसम्म गङ्गादशहरा मेला रहने जानकारी दिए । उनले भारतबाट दर्शनका लागि आउने श्रद्धालुलाई सहज रूपमा आउन पाइने व्यवस्था मिलाउन प्रशासनलाई आग्रह गरेका छन् । “अहिले नाकामा धेरै कडाइ गरिएको छ,” चन्दले भने, “तर बेहडाबाबाको दर्शनका लागि आउने भारतीय तीर्थालुलाई सहज रूपमा आउन दिने वातावरण बनाउन म प्रशासनलाई आग्रह गर्दछु ।”
बेहडाबाबा मन्दिरको दर्शनका लागि भारतको लखिमपुर, पलिया, चन्दनचौकी, तिकुनियाँ, बेलराया, भिरा, साहजाँपुरबाटसमेत तीर्थालु आउने गरेको बताइएको छ । यसै गरी विभिन्न जिल्लाबाट नेपाली दर्शनार्थी बेहडाबाबा मन्दिरको दर्शन गर्न आउने गरेका छन् ।
अध्यक्ष चन्दका अनुसार करिब सय वर्ष पहिले भारतीय एक ग्वालाको गाईले जङ्गलमा आफैँ उत्पत्ति भएको शिवलिङ्ग पत्ता लगाएको थियो । “मान्छेको बसोबास नभएको त्यो बेला यहाँ भारतका ग्वालाहरू गाई चराउन आउने गर्थे,” उनले भने, “एउटा गाईले शिवलिङ्ग फेला पारेर आफ्नो दुध चढाउँदै गरेको भेटिएको भनाइ छ ।” बेहडाबाबामा रहेको शिवलिङ्ग सबैभन्दा पहिले भारतीय ग्वालाले देखेर पूजाआजा गरेकाले यो मन्दिरप्रति पहिल्यैदेखि भारतीय श्रद्धालुको अगाध श्रद्धा रहेको बताइएको छ ।
प्रसिद्ध बेहडाबाबा मन्दिरको दर्शन गर्नका लागि धनगढी उपमहानगरपालिकाको कार्यालयले पालिकाभरि जेठ १२ गते स्थानीय बिदा दिएको छ । यस्तै रात्रीकालीन समयमा यात्रा गर्ने दर्शनार्थीको सुरक्षालाई मध्यनजर गरेर धनगढी उपमहानगरपालिकाको कार्यालयले धनगढीदेखि बेहडाबाबा मन्दिरसम्म बाटोभरि बत्तीको व्यवस्था गरेको छ । यसै गरी सहज आवतजावतका लागि सडक मर्मत पनि गरिएको छ ।