सागर कुस्मी
हसुलिया । कैलाली जिल्लाके कैलारी गाउँपालिका भिट्टर पर्ना वडा नम्बर ३ शिवरत्नपुर, मोहनपुर, ओ वडा ७ नम्बरमे पर्ना हौसलपुर गाउँमे साहित्यिक यात्रा कैगैल बा । इ तीनु गाउँबासीनके जनजीवनके अवस्था बुझक लाग साहित्यकार ओइने साहित्यिक यात्रा हुइल हो ।

यात्रामे दांगसे साहित्यकार नीम बहादुर थापा, छविलाल कोपिला, नेपालगंजके खगेन्द्र गिरि कोपिला, सुर्खेतके ललित केसी, कैलालीके सागर कुस्मी, पत्रकार नरेन्द्र चौधरी ओ तीनु गाउँबासी लोग रहिंट । उहाँ लोग नेपाल ओ भारत सिमानाकामे प्रत्यक्ष पुगके अध्ययन अवलोकन कैलैं ।

कैलाली जिल्लाके कैलारी गाउँपालिकाके सिमानासे छुवल सिमाना, मोहनपुर, शिवरत्नपुर ओ हौसलपुर गाउँ यात्रा कैल नीम बहादुर थापा बटैलैं । उहाँ कहलैं, गैल बरस मोहनपुर साहित्यिक कार्यक्रम निप्टाके नेपाल ओ भारतके सिमानामे रहल कुछ पिल्लरके बारेमे अवलोकन कैगैल रहे । मने अप्कि मोहनपुर गाउँक कार्यक्रम सेक्के गाउँक आर्थिक, सामाजिक, सांस्कृतिक ओ भौगोलिक अवस्थाके बारेम गाउँ मनैंनसे बातचित करल बटैलैं ।

मोहनपुर, शिवरत्नपुर ओ हौसलपुर इ टिनु गाउँ मोहना लडियाके ओहपार परठ । इ गाउँक् मोहना लडियासे बहुत पिडित गाउँ हो । यहाँ जाइक लाग बहुत कठिन डग्गर बा । इहे असारमे आइल बार्हसे मोहना लडियाके कटानसे अब्बे शिवरत्नपुरके छुट्की पुरुवा पूरा विस्थापित हुइल बा ।

इहे पुस १३ गते शिवरत्नपुर गाउँ पुगके गाउँबासीन्से अन्तरक्रीया छलफल हुइल दांग डेउखरके साहित्यकार छविलाल कोपिला बटैलैं । गैल ५ बरसके डौरानमे स्थानीय सरकार कटरा विकास हुइल बा ओ अइना दिनमे का का काम हुइटी बा, गाउँक लोगनसे बैठके बात हुइल बटैलैं । शिवरत्नपुर गैल बर्खाके समयसे कुछ घर विस्थापित होके बैजपुर गाउँक लग्गे बनुवाँमे शरण लेके बैठल बा ।

ओस्टेके हौसलपुर गाउँ पुगकेफे गाउँ सक्कु जहनसे बैठके छलफल हुइल नेपालगंजके साहित्यकार खगेन्द्र गिरि कोपिला बटैलैं । आउर गाउँ जटरे सुविधा हुइलेसे फेन अभिन हौसलपुरके लर्का भारतमे पर्हे जैना बाध्यता बटिन उहाँ बटैलैं ।

उहाँ कहलैं, लडिया कटानसे बर्खामे लर्कनके पर्हाइमे एकदम समस्या बिल्गाइठ । अइसिन समस्याहे हलि समाधान करक लाग स्थानीय सरकार, सम्बन्धित निकाय, सरोकार वालनसे बैठके बातचित कैना सुझाब डेलैं ।

साहित्यिक यात्रामे नेंगल सुर्खेतके साहित्यकार ललित केसी ओ सक्कु साहित्यकार सिमानाकासे जुरल कविता, गजल मुक्तक फेन गाउँबासीनहे सुनैले रहिंट ।

इ यात्रामे कैलारी गाउँपालिका अध्यक्ष राज समझ चौधरीफें मोहनपुर गाउँ पुगल रहिंट । उहाँ दुर दुरसे आइल सक्कु साहित्यकार ओइन साहित्यिक यात्राके सुभकामना फेन डेलैं । उहाँ कहलैं, इ तीनु गाउँक् समस्याहे समाधान करक लाग पालिकासे प्रक्रिया लग्टार आघे बर्हटी रहल बटैलैं ।

उहाँ कहलैं, मोहनपुरके झुलुंगे पुलके काम सुरु होके अझ्कल काम हुइटी रहल जानकारी डेलैं । ओस्टेके हौसलपुरके झुलुंगे पुल बन्ना काम हुइटी बा कहलैं । कलेसे शिवरत्नपुरके बार्ह पीडित ओइन्के समस्या फेन हलि समाधान हुइना बटैलैं । कौनो फेन काम पालिकासे सकभर हलिसे हलि समाधान करटी रहल उहाँ बटैलैं ।

हौसलपुर, शिवरत्नपुर ओ मोहनपुर इ तीनु गाउँ मोहना लडियाके ओहपार भारतके सिमानामे परठ । जहाँ तीनु गाउँमे स्वास्थ्य, शिक्षा, खानेपानी, यातायातके अभिन बहुत जेडा समस्या रहल मोहनपुरके, हरिप्रसाद चौधरी, सुमन चौधरी, सुनिल चौधरी, भोजलाल चौधरी, शिवरत्नपुरके हिरा चौधरी, भलमन्सा धनिराम चौधरी, मानबहादुर चौधरी, हौसलपुरके भलमन्सा, टिकाराम चौधरी अपन अपन गाउँक समस्याके बारेम बात बटैलैं ।