धनगढी, ६ भदौ । कैलाली जिल्लाके धनगढी उपमहानगरपालिका वडा नम्बर ५ जाईगाउँमे हरेरी महोत्सव सुरु हइल बा ।
धानवालीहे किराकाँटीसे बचैनाकेसंग थारु समुदायके कला, संस्कृति संरक्षण प्रवद्र्धनके लाग हरेरी महोत्सवक आयोजना करल महोत्सव मुल समितिक संयोजक तथा जाई गाउँक भल्मन्सा कुलविर चौधरी जानकारी डेलैं ।
उ महोत्सवहे सुदूरपश्चिम प्रदेश सभा सदस्य तथा सामाजिक विकास समितिके सभापति धर्मराज पाठक मन्डरा बजाके विधिवत उद्घाटन करले रहिटं ।

थारु समुदायमे हरेरीके आपन महत्व रहल कहटी इहीहे जोगैना उहाँ आग्रह करल रहिटं । ओस्टेक उहाँ सुदूरपश्चिम प्रदेश सरकार आब हाली बरघर ऐन बनैना बटैलैं । उहाँ कलैं, बिचमे सरकार अलमलम रहल, सदन अवरुद्ध रहे । अब्ब भरर्खर लौव सरकार गठन हुइल बा । बरघर ऐनक ड्राफटफे मोर टेबुलमे पुगल बा, आब हाली पास हुई ।
थारु कल्याणकारणी सभाक केन्द्रीय पार्षद माधव थारु, धनगढी नगरस्तरीय भल्मन्सा समितिक अध्यक्ष रोहितकुमार चौधरी थारु, समुदायमे रहल हरेरी पुजाहे संरक्षण कैना समुदायसंगे राज्यके दायित्व रहल जनैलैं ।
महोत्सव उद्घाटन महोत्सव मूल समितिक संयोजक तथा जाई गाउँक भल्मन्सा कुलविर चौधरीके अध्यक्षतामे हुइल रहे । भदौ ७ गतेसम सञ्चालन रना महोत्सव अवधिभर थारु समुदायके टमान मेरिक गीतवाँस, टमान मेरिक नाँच प्रस्तुतिसंगे संस्कृति सम्बन्धी बहस कैना भल्मन्सा चौधरी जानकारी डेलै ।

उहे बिच गाउँक बृद्धिजीवी धनबहादुर चौधरी हरेरी पूजाके एकदिन आघे रातभर डेशबन्धिया ओ केशौका गुरुवासे दिवाल जगैना करल बटैलै । उहे रात गुरुवासे धानवलीमे लागल किराकाँटी पकरके नानके गुरै करटी किरुवा खैना चालनफे रहल बा ।
विहानहे घरेलु औषधि, दूध पानी खेतुवामे छिटना चलन बा । डेशबन्धिया ओ केशौका गुरुवासे गुरै करटी टरासन ठोक्जैना करल उहाँ बटैलै ।
जिहीसे धानवलीमे लागल किराकाँटी, रोगव्यधी नइलग्ना जनविश्वास बा । उहे दिनसे बर्कीमार, सखियाके नाँचफे सुरु हुइना उहाँ बटैलै । मने कोई कोई गाउँमे कृष्णाजलम अष्टमीसे सखिया सुरु करल पाजाइठ् ।