२० माघ २०७९, शुक्रबार February 3, 2023

हस्तकला प्रर्वद्धनके लाग नुक्लिपुर महोत्सव

१० पुष २०७९, आईतवार
हस्तकला प्रर्वद्धनके लाग नुक्लिपुर महोत्सव

सागर कुस्मी
धनगढी । सामुदायिक होमस्टे गाउँ नुक्लिपुर महोत्सवमे हस्तकला समाग्री मिल्ना हुइल बा । स्थानीय ओइनसे हाँठेलेके सिर्जाइल थारु हस्तकला फेन खरिद करे सेक्ना हुइलक हो ।

थारु समुदायके पहिचान बोकल स्थानीय हस्तकलाके व्यवसायिक रुपमे प्रबर्द्धन करक अइसिन कलाके प्रदर्शनी कैनाके संगसंगे खरिद बिक्री फेन करे सेक्ना आयोजक जनैले बा ।

अध्यक्ष दिनेश दहितके बटाइल अन्सार महोत्सवमे स्थानीय पुर्खनके हाँठेसे बिनल चिजबरन सस्टा मोलमे किने सेक्जैना बा । जेकर मोल डिलिया २००, छिटुवा ५००, छट्री १०००, बेंर्री १५०, खैंचा ३००, साडा बिंर्रा २००, बुट्टाडार बिंर्रा सिरहट्टा सहित ३००, साडा ढकिया १५००, पनुवाडार ढकिया २१००, डोना ५, टेपरा १०, ढर्हिया ३०००, डेलुवा ९००० मोल टोकल बा ।

’महोत्सव जस्टे जस्टे लग्गे आइटा ओस्टे ओस्टे नुक्लिपुर गाउँ बासी हरचाली कैनामे डटकरल बटि’ भलमन्सा हिंगुराम चौधरी बटैलैं, ’महोत्सवके सामाजामा ढेर कैना हुइलेक ओर्से अझ्कल हेग्ना मुट्ना फें सँपार नैहो ।’ मेढारुन डोना, टेपरा, ढकिया, डेलुवा सिँगार पटार कैनामे लागल बटैं कलेसे ठारु ओइने हेल्का, डिलिया, छ्ट्री छिटुवा । इ सक्कु सामान ढेर खरिदलेसे छुट मिल्ना बा ।

नुक्लिपुर महोत्सव चलट्सम खैना, सुट्नामे अउरे ठाउँसे कम रुपियामे खाइ मिल्ना आयोजकके कहाइ बा । यहाँ गैलेसे प्राकृतिक टलुवाके सुन्दर शान्त पर्यटकीय स्थल डुबरी टलुवा, चमरहिया टलुवा ओ लक्ष्मी सामुदायिक बनुवाँ फेन अवलोकन भ्रमण करे सेक्ना अध्यक्ष दहित बटैलैं ।

कैलाली जिल्लक गौरीगंगा नगरपालिका वडा नम्बर १० भिट्टर पर्ना नुक्लिपुर गाउँमे रहल सामुदायिक होमस्टे नुक्लिपुरके विशेष अगुवाइमे महोत्सव हुइ जैटी बा ।

पुस २५ गतेसे २९ गतेसम लग्ढार ५ दिनसम चालू रहना महोत्सव लिरौसीसे संचालन करक लाग टमान उपसमिति फेन बनागैल बा । स्टल संयोजक रामचरण चौधरी, पहुना स्वागत संयोजक हिंगुराम चौधरी, कार्यक्रम संयोजक भागीराम चौधरी, खेल संयोजक नवीन खाती ओ आर्थिक व्यवस्थापन संयोजक दिनेश दहितहे जिम्मा डेहल बा ।

अस्टेक नन्हें थारु होमस्टे गाउँ भादाके आयोजनामे फेन इहे पुस १४ गतेसे भादा गाउँमे होमस्टे लागे जाइटा । भादामे बिटल १० बरससे महोत्सव लग्टी आइल बा ।