सागर कुस्मी
धनगढी । अपन भासा, साहित्य, कला ओ संस्कृति जिहि फेन मैंयाँ लागठ । ओहेमारे अपन अपन गीतबाँस जुगजुग बचाइक लाग ओ अपन समुदायके पहिचान कराइक लाग नुक्लिपुर गाउँ फेन एकजुट हुइल बटैं ।

कैलाली जिल्लक गौरीगंगा नगरपालिका वडा नम्बर १० भिट्टर पर्ना नुक्लिपुर फेन एक आदिवासीनके बसाइ रहल गाउँ हो । पुर्खौंसे चल्टी आइल चालचलन, रीतिरिवाज, परम्पराहे लावा युवा पुस्टनहे सौंपटी नुक्लिपुर गाउँक् पहिचानके लाग संरक्षण ओ सम्बर्द्धनके लाग गाउँक् सुरट फेरटी गैल नुक्लिपुर सामुदायिक होमस्टेके अध्यक्ष दिनेश दहित बटैलैं ।

उहाँक् बटाइल अन्सार, आब नुक्लिपुर थारु गाउँ नुक्लिपुरमे किल सिमित नैरहिगैल । आब इ गाउँ एक व्यवसायिक रुपमे आघे बर्हटी गैल ’नुक्लिपुर थारु सामुदायिक होमस्टे’से परिचित हुइना हुइल बा । जेकर घुरघुट इहे पुस २५ गते सोम्मारके रोज उघार जैटी बा ।

होमस्टेक् घुरघुट उघरलक् रोज थारु गुरुवनके शक्ति डेखैना, रमझम मेला लग्ना, थारु हस्तकला डेखैना, थारु कलाकार लोगनसे मेरमेराइक गीतबाँस गवइना, गाउँक् ठरियाँबहिनियनके सखिया, झुमरा नाच फेन हेरे मिल्ना भलमन्सा हिंगुराम चौधरी जनैलैं ।

अस्टेके महोत्सवके मौकामे फुटबल खेलफें हुइक लाग बा । जौन मैत्रीपूर्ण खुल्ला पुरुष फुटबल जुझिकजुझा हुइना आयोजकके कहाइ बा ।
हरेक रोज फरक फरक टीमके खेल हुइ कलेसे स्टेजमेफें मेरमेराइक गीतबाँस, नाचगानके रमझम फेन रहि ।

खेल जिटुइया पहिल हुइना टीमहे नगद ३० हजार ओ डुसरा हुइना टीमहे १५ हजार डेना खेलके संयोजक नवीन खाती जनैलैं । हरेक रोज हर मेरके कला प्रस्तुति ओ हरेक मेरके खानपिनके व्य्वस्था रहना कार्यक्रम संयोजक भागीराम चौधरी बटैलैं ।

अब्बे नुक्लिपुर गाउँमे थारु ओ गैरथारु मिलाके ९० घर बा कलेसे ३६ घर थारुनके किल बा । जेम्नेसे ६ ठो घर घरबास (होमस्टे) संचालन हुइल बा । इहे पुस २५ गतेसे २९ गतेसम चल्ना नुक्लिपुर सामुदायिक होमस्टे महोत्सवमे ६ ठो कोन्टी मिझ्नी खाइक लाग बनागैल बा । जौन सक्कु कोन्टीके फरक फरक नाउँ ढारगैल बा कलेसे सक्कु कोन्टीके फरक फरक पहिचान सहितके फोटु फेन टाँसल अध्यक्ष दिनेश दहितके कहाइ बा ।

पुरान पुरान पुर्खा लोगनसे पुरनियाँ गीत ढमार, माँगर, सजना लगायत गीत फेन सुन्टी कोन्टीमे पहुना सम्मान सटरंग गोंडरीमे बैठाके होमस्टेके सखी गोचा लोग स्वागत कर्ना आयोजक जनैले बा । जहाँ फुलौरी, खँरिया, घोंघि, मुसक बुट्टी, सुरिक बुट्टी, पकुवा, घरैया बजर्हा मुर्घिक बुट्टी, सुटही, बैरिक चटनी, सिन्की, आलु, गोभीक् मेरमेराइक पाकवान, अँचार, अन्डिक झोर, डबुवा, छबुवा, करैया मड, महुवाँरी, हरमेरिक अंग्रेजी मडके जलपान लेहे सेक्ना आयोजक के कहाइ बा ।

थारु समुदाय जल, जमिन ओ जंगलसे सदियोंसे मैगर ओ लस्गर सम्बन्ध हुइलक ओरसे बनुवाँहे पर्यपर्यटनसे जोरके जैविक विविधताके संरक्षण सम्बर्द्धन करक लाग फेन इ होमस्टेके अवधारणा लानल अध्यक्ष दहित बटैलैं । आन्तरिक ओ बाह्य पर्यटक लोगन घरबासमे बैठाके गाउँवासीनके जीवनस्तर ओ आर्थिक रुपमे सक्षम करैटी जैना होमस्टेके विशेष उद्देश्य बटिस ।

इ कार्यक्रम लक्ष्मी सामुदायिक वनके खेल मैडानमे हुइना आयोजक बटैले बा । आयोजकमे नुक्लिपुर सामुदायिक होमस्टे, जनजागृति युवा क्लव ओ नुक्लिपुर गाँउ समाज सक्कु जाने मिलके कार्यक्रम उसरनामे कसके भिंरल बटैं ।

नुक्लिपुर गाउँक् इतिहास का हो ?
साविक उदासीपुर गाविस १ अब्बे गौरीगंगा नगरपालिका १० नुक्लिपुर गाउँ फेन बहुत पुरान बस्ती हो । पहिले चारुओरसे बनुवाँसे घेरल ठाउँ रहे । गाउँ पूरा बिल्गैबे नैकरे । गाउँ पूरा नुकल रहे । नुकल ओरसे इ गाउँक् नाउँ नुकलपुर होगैल । नुकलपुर अस्टे कहठ कहठ पाछे नुक्लिपुर गाउँक नाउँ परल होमस्टे अध्यक्ष दिनेश दहित बटैठैं ।

बनुवाँमे बहुत खुंखार खुंखार जानवर मिलिंट । हाँठी, बाघ, भालु, गैंरा, मजोर, गिडार, मेरमेराइक जीवजन्तु, चिरैंचुरंगन छकिटरा रहिंट । हाँठी, बाघ, भालु फेन खोप हैमस करिंट ।

कैसिक जैना नुक्लिपुर गाउँ ?
इ गाउँक सिमाना, उत्तरओर उदासीपुर गाउँ, डख्खिनओर कैलारी गापा ८ के भगहा गाउँ, पुरुबओर भगतपुर ओ सुन्दरपुर गाउँ, पस्छिउँओर लक्ष्मी ओ सरस्वती सामुदायिक वन परठ ।

नुक्लिपुर गाउँ गौरीगंगा नगरपालिकाके १० वडा नम्बरमे परठ । इ गाउँ राजमार्ग बर्हैपुर आर्मी व्यारेकसे ७ किलोमिटर डख्खिन जाइ परठ । उदासीपुरके सरस्वती माध्यमिक विद्यालयसे १ किलोमिटर भिट्टर बनुवाँटिर बा नुक्लिपुर गाउँ ।

अस्टेके हुलाकी सरकमे पर्ना हसुलिया बजारसे १६ किलोमिटर उत्तर जाइ परठ । सुन्दर शान्त वातावरणमे रहल नुक्लिपुर चारुओर हरियर रुखुवासे मन लोभवाइठ हरकोइ वहाँ पुगुइया पर्यटक लोगनके । होमस्टेमे मिठमिठ खानपिनसे स्वागत करक हरदम मुस्कुराके असरा लागल बा नुक्लिपुर गाउँ ।