धनगढी । गठबन्धनके तर्फसे गीता कुमारी चौधरी सुदुरपश्चिम प्रदेश सभामे समानुपातिक सांसद हुइल बटैं । थारु समुदायसे गठबन्धनसे उहाँ अक्केली सांसद हुइल हुइँटै । उहाहे काँग्रेस समानुपातिक सांसद बनाइल हो ।

२०७४ सालमे उहाँहे समानुपातिकके बन्द सुचीमे ढारगैल रहे । मने उ बेला उहाँ सांसद बने नैसेक्लैं । टौन फें उहाँ अपन विचारमे अडिग होके लग्ढार सकृय होके राजनितीमे लग्ले रलैं ।

उहाँ आब सांसद बनलेसे पछगुरल वर्ग लोगनके राजनितिक अधिकारके लाग काम कर्ना बटैलैं । उहाँ कहलैं,’ मै थारु समुदायसे सांसद हुइल बटुँ, महिन सबजे विश्वास कैले बटैं । संसद कलक नीति कानुन बनैना ठाउँ हो । ओहेमारे पिछरल समुदायके हक अधिकारके लाग काम करम ।’

उहाँ कलैं, ’महिन पार्टी विश्वास कैके सांसद चुन्ले बा । मै मन्त्री फेन बन्बुँ । मै गठबन्धनके तर्फसे थारु समुदायसे अक्केली महिला सांसद हुइल बटुँ । ओहे हिसाबसे फें महिन पार्टीले मन्त्री बनैने जो बा ।’

अइना दिनमे थारु, मधेसी, जनजाति, आदिवासी, महिला, दलित, मुश्लिम ओ सीमान्तकृत समदुाय लगायतके हक, अधिकारके मुद्दाहे सम्वोधन कैना उहाँके कहाइ बा ।

के हुइन गीता चौधरी ?
हाल कृष्णपुर नगरपालिका ६ सिङ्गपुर, कंचनपुर (साविक कृष्णपुर गाविस ७) बाबा नत्थुराम चौधरी ओ डाइ बुधनी देवी चौधरीके कोखसे वि. स. २०४६ साल कार्तिक १३ गते गीता चौधरी इ ढर्टीमे गोरा टेक्लैं ।

उहाँ महाकाली माध्यमिक विद्यालयसे एसएलसी ओ प्रविण प्रमाणपत्र तह पास हुइलैं । कृष्ण बहुमुखी क्याम्पससे बीए पास कैके सुदुरपश्चिम एकेडेमी धनगढीसे एमए समके पर्हाइ लिखाइ कैले बटैं ।

छोट्टेसे अपन बाबाके राजनीति से प्रभावित होके राजनितीमे लागल उहाँ बटैठैं । समयके डौरान संगे उहाँ नेपाली कांग्रेसके नेता एनपि साउँदसे परिचित होके आउर सक्रिय हुइटी गैलैं ।

गीता चौधरी नेपाली काँग्रेसके साधारण सदस्य हुइटी हाल महाधिबेशन प्रतिनिधी फेन हुइटैं । १६ वर्ष के छोटे उमेरमे उहाँ २०६३से अपनहि पर्हल स्कुलमे ६ बरससम शिक्षण फेन करलैं । उहाँ ३ बरससम सिंहपुर सामुदायिक वनके कोषाध्यक्ष ,२ बरससम सिंहपुर सामुदायिक वनके कार्यालय सचिब होके काम करल अनुभव बटिन । उहाँ थारु कल्याणकारीणी सभा कंचनपुरसे केन्द्रिय पार्सद फेन बटैं ।

ओस्टेके उहाँ विधुत सहकारीके सचिव, कंचनपुर सिचाई परियोजनाके कोषाध्यक्ष, सिंहपुर युवा क्लवके सचिव, प्रधानमन्त्री सुपरजोनके सह–संयोजक लगायत टमान संघसस्थामे सक्रिय होके अपन जिम्मेवारी पूरा कैले बटैं ।

आबेक ३ बरससे एहोंर अपन गोसिया डा. फुलराम चौधरीसे कंचनपुरके गुलरिया बजारमे निमेष अस्पताल चालू कैके बिरामिनकके हेरविचार कर्टी आइल बटैं । डा. फुलराम चौधरी फेन टमान सामाजिक काममे ढेर मद्दत कर्टी आइल बटैं ।