धनगढी, १३ अगहन । मानव बेचबिखन तथा ओसारपसार ओ उहीसे पीडित तथा प्रभावितके उद्धारके लाग विशेष नीति तथा कार्यक्रम लाने पर्ना जोड डेहल बा ।
शान्ति पुनस्र्थापना गृह धनगढी शाखाके आयोजनामे बुधके रोज हुइल आव २०८०÷०८१ मे सञ्चालित कार्यक्रमके बार्षिक सामाजिक लेखा परिक्षणके सहमागिहुक्रे ओइसीन जोड डेहल हुइट ।
कार्यक्रमके बर्का पहुना तथा जिल्ला समन्वय समिति कैलालीके कार्यवाहक प्रमुख खगराज भुषाल मानव बेचबिखन तथा ओसारपसार नियन्त्रण ओ उहीसे प्रभावितके उद्धार ओ पुनस्र्थापनाके लाग सरकारी पक्षसे विशेष नीति तथा कार्यक्रम सहित बजेट विनियोजन करे पर्ना जोड डेहल रहिट । ओस्टके उहाँ शान्ति पुनस्र्थापना गृहसे मानव बेचबिखन विरुद्धके अभियानमे महत्वपूर्ण योगदान फेन पुगाइल बटाइल रहिट ।

‘शान्ति पुनस्र्थापना गृह मावन बेचबिखन तथा ओसारपसार रोकथाम तथा नियन्त्रण कैना उद्देश्यसे खुलल् संस्था हो । संस्था आपन स्थापनाकालसे अब्बे आइटसम बहुट मजा काम कैटी आइल बा’, उहाँ कहलै, ‘संघसंस्थासे खास कैके राज्यहे सहयोग कैना हो, इ मेरके कार्यक्रम सरकार अपनहे करे पर्नाहो, ओकर लाग विशेष कैके राज्य ओ स्थानीय तहसे नीति तथा कार्यक्रम सहित बजेट विनियोजन कैटी कार्यक्रम सञ्चालन करे पर्ना हो ।’
भजनी नगरपालिकाके नगरप्रमुख केवल चौधरी खुल्ला भारतीय सिमानाकाके कारण मानव बेचबिखन नियन्त्रण तथा रोकथाममे चुनौती रलेसे फेन अब्बे ठाउँ ठाउँमे विओपी स्थापनासे नियन्त्रणमे सहयोग पुगल बटाइल रहिट ।
ओस्टके पुनर्वास नगरपालिकाके नगरप्रमुख तोयराज शर्मा मानव बेचबिखन नियन्त्रणके लाग शान्ति पुनस्र्थापना गृहसे समन्वय ओ सहकार्य कैटी आघे बह्रल बटाइल रहिट ।जिल्ला प्रहरी कार्यालय कैलालीके प्रमुख पदम बहादुर बिष्ट मानव बेचबिखन विरुद्ध सुरक्षा निकाय विशेष रुपमे खटल बटाइल रहिट । ओस्टके उहाँ उ अभियान विरुद्ध सक्कु निकायसे समन्वय ओ सहकार्य फेन जारी रहल बटाइल रहिट ।
कार्यक्रममे पुर्नवास नगरपालिकाके नगर उपप्रमुख भुलिया राना, कैलारी गाउँपालिकाके उपप्रमुख भगवती चौधरी, राष्ट्रिय मानव अधिकार आयोगके झंकर रावल लगायत मनतब्य राखल रहिट । उहाँहुक्रे मानव बेचबिखन तथा ओसारपसार नियन्त्रण ओ उहीसे प्रभावितहुक्रनके उद्धार ओ पुनःस्थापनाके लाग समन्वय सहकार्य कैटी आघे बह्रना प्रतिवद्धता जनाइल रहिट ।

उहे बिच शान्ति पुनस्थापना गृह कैलालीके कार्यक्रम संयोजक कैलाशो राना संस्थासे आव २०८०÷०८१ मे सञ्चालित कार्यक्रमके बार्षिक प्रतिवेदन प्रस्तुत करल रही । उहाँसे प्रस्तुत करगैल प्रतिवेदनमे कैलालीमे ९ हजार ५८२ जनहनहे परामर्श, ३९३ जनहनके उद्धार करल बटाइल रही । ओस्टके कञ्चनपुरमे ४ हजार ७३५ जहनहे परामर्श ओ २९७ जहनके उद्धार करल बटाइल रही ।
ओस्टके उहाँ संस्थाके आयव्यय फेन प्रस्तुत करल रही । कूल १ करोड २५ लाख ८३ हजार ६९३ हजार बजेट रहल संस्थाके १ करोड ३ लाख ७९ हजार ४६२ रुप्या खर्च हुइल जनाइल रहे ।
गृहके संस्थापक अध्यक्ष शान्ता सापकोटाके अध्यक्षतामे हुइल कार्यक्रममे क्षेत्रीय संयोजक सन्जित सिंह स्वागत मन्तब्य राखल रहिट । कलेसे कार्यक्रमके सञ्चालन शान्ति पुनस्र्थापना गृह भजनी शाखाके पुनम विश्वकर्मा करल रहिट ।
कार्यक्रममे विभिन्न सरकारी तथा गैरसकारी निकायके प्रतिनिधी, सुरक्षा निकायके प्रमुख तथा प्रतिनिधी, सञ्चारकर्मीहुक्रनके सहभागिता रहल रहे ।