कंचनपुर । डसियाके सुभ अवसरमे थारु समुदायके युवनहे गजल प्रशिक्षण कार्यक्रम हुइल बा ।

ओजरार मिडिया प्रालीसे संचालित कैलारी अनलाइन ओ हरचाली साहित्यिक त्रैमासिक पत्रिकाके खास व्यवस्थापनमे कंचनपुरके शुक्लाफाँटा नगरपालिका ८ बेलडाँरी कंचनपुरमे गजल प्रशिक्षण हुइल बा ।

८ नम्बर के वडा अध्यक्ष जनक चौधरी कहलैं, अइसिन मेर्के तालिम हमार गाउँमे पहिल बार हुइल बा । इहिसे युवा पुस्टाके लर्का थारु भासा साहित्यमे कुछ ना कुछ हुइलेसे फेन सिख्ना मौका पैले बटैं । कुछ नैजन्ना लर्का अब्बे गजल लिखे सेक्ना हुइल उहाँ बटैलैं ।

ओस्टेके बेलडाँरी गाउँक भलमन्सा हरपाल चौधरी कहलैं, इ दुई दिनके तालिमसे अइना दिनमे हमार लर्कापर्का जरुर कुछ करे सेकही कना बात बटैलैं । तालिममे सक्कु सहभागीनहे दिलसे साहित्यमे कलम चलाइ पर्ना अर्जी कैलैं ।

कार्यक्रममे सहभागी हुइल लर्कनहे धन्यवाद डेटी कहलैं, हमार गाउँघरके लर्का मौका नैपाके आघे बर्हे नैसेकल बटैलैं । ओहेमारे अइसिन तालिम नियमित हुइलेसे आकुर युवा लर्का आघे बर्हे सेक्ना बटैलैं ।

ओस्टेके बेलडाँरी गाउँक् सोरहिनियाँ कलापती चौधरी कहली, मै अपन गाउँमे अइसिन प्रतिभा रहल लर्का हुइही कहिके आझ भर्खे पटा चलल । महिन बिस्वास बा कि यदि इ लर्का मन्च भेटैही कलेसे जरुर अपन गाउँके लाग कुछ कर्ही कना आस बा ।

हरेक मनैनमे कुछ ना कुछ प्रतिभा नुकल रहठ । उ प्रतिभाहे समाजमे प्रस्तुत करक लाग इ कार्यक्रमके योजना करल पत्रिकाके प्रधान सम्पादक सागर कुस्मी बटैलैं ।

उहाँ कलैं, इ प्रशिक्षण कार्यक्रमसे युवा पुस्टनके साहित्यमे रुचि बरहाइक लाग ओ साहित्यमार्फत समाजमे थारु भासा साहित्यके विकास हुइक लाग कार्यक्रम हुइ बटैलैं ।

अझ्कल सामुदायिक स्कुल डसियाके बिदा हुइल बा । इ समयमे अब्बे ढेर विद्यार्थी खाली बैठल बटैं । ओहेमारे समयहे सदुपयोग कैके साहित्यिक गतिविधि कैके कुछ अपनठन रहल ज्ञानगुणके बात सिखैना ओ सिख्ना होए कहिके इ कार्यक्रमके अभियान चलाइल सम्पादक कुस्मी बटैलैं ।

शुक्लाफाँटा नगरपालिका वडा नम्बर ८ के बेलडाँरी, पिल्लरी, नौखरी, सुन्दरीफाँटा लगायतके ३० जहनके युवा लर्कनके सहभागीता हुइल रहे । डसियाके बाड कैलाली, कंचनपुर जिल्लामे टमान ठाउँमे इ गजल लेखन अभ्यास हुइना गजल प्रशिक्षक गजलकार सागर कुस्मी जानकारी डेलैं ।

प्रशिक्षणके बाड लगटार लेखनमे सक्रिय हुइल लेखक ओइनहे भेला कराके वृहत साहित्य सम्मेलन कैना आयोजकके योजना बटिस । गाउँ समाजमे रहल ढेरहस युवा कौनो अवसर नैपाके अपन प्रतिभा डेखाइ नैपाके मनके भिट्टर नुकल रठिन ।

नुकल प्रतिभाहे खोजके कार्यक्रमके कैके लावा लेखक ओइनहे आघे बर्हैना, ओइन्के करियर मजा बनैना आयोजक बटैले बा । इहिसे आघे फेन कैलारी अनलाइनके सहयोग ओ हरचाली साहित्यिक त्रैमासिक पत्रिकाके आयोजनामे टमान ठाउँमे गजल, मुक्तक, कविता, ओ उदघोषण तालिम हुइटी आइल बा ।