धनगढी । धनगढीमे हुइना सुदूरपश्चिम राजधानी कप २०७९ के ट्रफी ओ खेल तालिका सार्वजनिक करल बा । कुँवार ८ गतेसे १५ गतेसम धनगढी रंगशालामे हुइना फुटबल प्रतियोगिताके एक कार्यक्रमबीच ट्रफी ओ खेल तालिका सार्वजनिक करल हो ।
पिएफए स्पोटर्स क्लबके आयोजनामे हुइना प्रतियोगितामे ९औं राष्ट्रिय खेलकुद प्रतियोगितामे सहभागिता जनुइया ७ प्रदेशके टोली ओ एक घरेलु टोली सहित ८ टीमके सहभागीता रहल प्रतियोगिता संयोजक दिनेश श्रेष्ठ जानकारी डेलै ।
प्रतियोगिताके उद्घाटन खेलमे सुदूरपश्चिम प्रदेश रातो ओ कर्णाली प्रदेश प्रतिस्पर्धा कैना बाटै । सार्वजनिक खेल तालिका अनुसार कुँवार ८ गते हुइना उद्घाटन खेलमे डुनु प्रदेश खेल्ना हुइल हुइट ।
सुदूरपश्चिम प्रदेश रातो, कर्णाली प्रदेश, बागमति प्रदेश ओ प्रदेश नम्बर १ समुह ए मे रहल बाटै । समुह बी मे मधेश प्रदेश, लुम्बिनी प्रदेश, गण्डकी प्रदेश ओ सुदुरपश्चिम निलो रहल बाटै ।
प्रतियोगिताके विजेता नगद ५ लाख ओ उपविजेता ३ लाख प्राप्त कैना बाटै । टमान विधाके उत्कृष्ट खेलाडीहे जनही १० हजार नगद ओ उत्कृष्ट खेलाडी नगद २० हजार प्राप्त कैना बाटै । प्रतियोगिताके मुख्य प्रवर्धकमे सुदूरपश्चिम खेलकुद परिषद् रहल बा ।
ओस्टके सह–प्रायोजकमे नेपाल टेलिकम ओ राष्ट्रिय खेलकुद परिषद् नेपाल रहल बा । ’हाम्रो गौरव सुदूरपश्चिम राजधानी कप’ मुख्य नारा लेके प्रतियोगिताके सुरुवात करल आयोजक जनैले बा । प्रतियोगिताके इ चौथो संस्करण हो ।