धनगढी, ३० जेठ । सेती प्रादेशिक अस्पतालमे निःसन्तान उपचार केन्द्र स्थापना कैके सेवा सञ्चालनमे लन्ले बा ।
प्रादेशिक अस्पतालसे स्थापना करल निःसन्तान उपचार केन्द्रके अस्पतालके प्रमुख मेडिकल सुपरिटेन्डेन्ट डाक्टर हेमराज पाण्डे शुकके उद्घाटन करले बटै । केन्द्रके उद्घाटन कैटी मेसु पाण्डे संघीय ओ प्रदेश सरकारके सहयोगमे स्थापना करल बटैलै ।
उहाँ गैल बरस निःसन्तान उपचार केन्द्र सञ्चालन कैना तयारी रलेसे फेन कुछ प्राविधिक समस्यासे सञ्चालनमे आइ नैसेकल बटैलै ।
सुदूरपश्चिम प्रदेशमे सेवा अभावके कारण निःसन्तान दम्पती उपचारके लाग काठमाडौं तथा भारत जैना करलमे आब उक्त बाध्यता अन्त्य हुइल बटैटी सहज ओ सुलभ रूपमे धनगढीमे सेवा लेहे सेकजैना बटैलै ।
प्रादेशिक अस्पतालके स्त्री तथा प्रसुती रोग विभाग प्रमुख डाक्टर खगेन्द्र भट्ट निःसन्तानपन सम्बन्धि समस्याके टमान मेरके उपचार पद्धति रहल बटैटी अब्बे आधारभूत तहके आईयुआई सेवा सुचारू करल बटैलै ।
निःसन्तान सम्बन्धि कौनो फेन सेवा उपलब्ध नैरहल अवस्थामे सञ्चालन करल आईयुआईसे निःसन्तापन रहल दम्पती लाभ लेहे सेक्ना उहाँ बटैलै ।
उक्त सेवा अन्तरगत पुरूष ओ महिलाके समान्य स्तरके प्रजनन सम्बन्धि परीक्षण ओ परामर्श, पुरूषके विर्य विश्लेषण तथा तयारी, सस्तो, सुलभ, सहज ओ गोपनिय रूपमे सेवा प्राप्त करे सेक्ना बटैलै ।
डा. भट्ट यी सेवाके सुरूवात सुदूरपश्चिमके महत्त्वपूर्ण उपलब्धि रहल बटैटी भविष्यमे थप सेवा विस्तार करे सेक्ना बटैलै । ओहकान अनुसार प्रादेशिक अस्पतालसे निःसन्तापन रहल दम्पतीहे साढे ७ हजारके प्याकेज उपचार पैना बटैलै ।
विश्वव्यापी रूपमे १० से १५ प्रतिशत दम्पती बाँझोपनके समस्यासे प्रभावित रहलमे नेपालमे १३ से १५ प्रतिशत दम्पती यी समस्यासे प्रभावित हुइना अनुमान करल बा । बाँझोपनके समस्या महिला ओ पुरूष डुनु जनहनमे रहना चिकित्सक बटैले बटै ।