धनगढी, १२ बैशाख । थारु होमस्टे गाउँ भादामे सुदूरपश्चिम प्रदेश स्तरीय होमस्टे महोत्सव हुइना हुइल बावै ।
धनगढी उपमहानगरपालिका वडा नम्बर १६, स्थित होमस्टे गाउँ भादामे इहे बैशाख १८, १९ ओ २० गते तीन दिने प्रदेश स्तरीय होमस्टे मेला महोत्सव हुइना हुइल हो । आयोजक थारु होमस्टे गाउँभादा पर्यटन विकास तथा व्यवस्थापन समिति शुकके रोज धनगढीमे पत्रकार सम्मेलन मार्फत महोत्सव बारे जानकारी डेहल हो ।
समितिके अध्यक्ष लक्ष्मी नारायण चौधरी प्रदेशके टमान जातजाति तथा समुदायमे सञ्चालित होमस्टेके बजारीकरण ओ व्यवसायीकरण कैना उद्देश्यसे महोत्सव आयोजना करे लागल बटैलै ।

प्रदेशमे रहल टमान जातजाति तथा समुदायके परम्परा, संस्कार, संस्कृति, खानपान, भेषभुषा, शिपकला, प्राकृतिक सम्पदा, पर्यटकीय गन्तब्यके प्रचारप्रसार ओ प्रदशेक पहिचानहे होमस्टे पर्यटन व्यवसाय मार्फत राष्ट्रिय तथा अन्तराष्ट्रिय स्तरमे पुगाइक लाग महोत्सवके मुख्य उद्देश्य रहल होमस्टे महासंघ नेपाल सुदरपश्चिम प्रदेश अध्यक्ष दिनेश दहित बटैलै ।
महोत्सवके प्रवद्र्धकमे प्रदेश पर्यटन विकास कार्यक्रम कार्यान्वयन इकाई धनगढी, समन्वय होमस्टे (घरबास) महासंघ नेपाल सुदूरपश्चिम रहल बावै । महोत्सव दिपेन्द्र चारपाते माविके खेल मैदानमे हुइना जनाइल बावै । महोत्सवके आकर्षकमे हरेक दिन टमान जातजाति तथा समुदायके नाचगान, टमान समुदायके खानाके परिकार, शुक्लाफाँटा राष्ट्रिय निकुञ्जमे जंगल सफारी रहल बावै ।
ओस्टके खेलकूदमे श्लो साइकल रेस, गग्रीफोर, भलाद्मी दौड, पेनाल्टी सुटआउट, स्थानीय तथा राष्ट्रिय कलाकारके प्रस्तुती, थारु हस्तकलाके प्रदर्शनी रहल बावै । महोत्सवमे एकलाख जाने अवलोकन कैना जनाइल बावै ।