धनगढी, ११ बैशाख । आगामी आव २०८२/८३ के नीति तथा कार्यक्रम ओ बजेट तर्जुमा विषयमे सुदुरपश्चिम प्रदेश सरकार जुटल बावै ।
बुधके रोज मुख्यमन्त्री तथा मन्त्रिपरिषद्के कार्यालयमे आगामी आव २०८२/८३ के नीति तथा कार्यक्रम ओ बजेट तर्जुमा लगायत विविध विषयमे मुख्यमन्त्री शाह प्रदेश सरकारके मन्त्री, राज्यमन्त्री, प्रदेश नीति तथा योजना आयोगके पदाधिकारी ओ सचिवसँग छलफल करले बटै ।
छलफलमे मुख्यमन्त्री कमलबहादुर शाह सुदूरपश्चिम प्रदेशमे दीर्घकालीन प्रभाव पर्र्ना कार्यान्वयनयोग्य नीतिगत सुधार ओ प्राथमिकता क्षेत्र पहिचान कैके ओकर प्रतिवेदन १५ दिन भित्रे मुख्यमन्त्री तथा मन्त्रिपरिषद्के कार्यालयमे पेश कैना मातहतके मन्त्रालयहे निर्देशन डेले बटै ।
दीर्घकालीन महत्वके कार्यक्रम ओ कार्यान्वयनके अवस्था, आयोजना बैंकके कार्यान्वयनके प्रारम्भ एवं आगामी बरस संस्थागत कैना विषय, आयोजनाके डिजाइन, डिपिआरमे एकरूपता कायम कैना विषय, चालु खर्च कटौती कैना ओ पुँजीगत खर्च बह्रैना, प्रदेशके आन्तरिक राजश्व बह्रैना, विकासमे सुशासन, नागरिक सहभागिता एवं उपभोक्ता समितिके काम कारवाहीके प्रभावकारिता विषयमे छलफल हुइल रहे ।
आगामी आवके नीति तथा कार्यक्रमके लाग नागरिक जनजीवनसँग सम्बन्धित प्रभावकारी ओ नविनतम नीति, कार्यक्रम ओ आवश्यकतानुसार योजना छनौट कैना मुख्यमन्त्री शाह आग्रह करल रहिट ।