धनगढी, ५ बैशाख । नेशनल एकेडेमी अफ साइन्स एण्ड टेक्नोलोजी (नाष्ट) कलेजके २५औं वार्षिकोत्सव (रजत जयन्ती) तथा अभिभावक दिवसके शुकके रोज सम्पन्न हुइल बा ।
नाष्ट कलेज सञ्चालक समितिके अध्यक्ष डा. चेतराज पन्तके घरगोसियाइमे हुइल कार्यक्रमके बर्का पहुना प्रदेश प्रमुख नजिर मियाँ रहल रहिट । कार्यक्रमहे सम्बोधन कैटी प्रदेश प्रमुख मियाँ नाष्ट कलेज यी क्षेत्रके उत्कृष्ट कलेज रहल बटैटी नतिजा फेन उत्कृष्ट डेना सफल हुइल बटाइल रहिट ।

कार्यक्रममे अर्थ राज्यमन्त्री प्रकाश बम, प्रा. डा हेमराज पन्त, नाष्टके प्राचार्य डा. प्रेम बहादुर चन्द, आइक्यूएसीके सदस्य तथा अभिभावक रामप्रसाद चौधरी, विद्यालय व्यवस्थापन समिति सदस्य रुद्रलाल कडेल, एमबीए सेकेण्ड सेमेष्टरके विद्यार्थी शैलजा धामी, बीइ कम्प्युटरके बसन्तराज जैशी, कक्षा ११ के विद्यार्थी हेमन्त भण्डारी लगायत शुभकामना मन्तब्य राखल रहिट ।
कार्यक्रममे स्वागत मनतब्य नाष्ट माविके प्राचार्य उपेन्द्र बहादुर बम करल रहिट । आपन बालबच्चनहे विज्ञान व्यवस्थापन तथा प्रविधिके पठन पाठनसे सर्वाङ्गीण विकासके लाग गन्तब्य शिक्षालयके रुपमे रोजलमे उहाँ सक्कु अभिभावकहुक्रन प्रति अभार व्यक्त करल रहिट ।

उहे बिच कलेजसे प्रकाशित अनुसन्धानमूलक पत्रिका ‘जर्नल अफ नाष्ट कलेज’के विमोचन फेन करगैल बावै । पत्रिकाके बिमोचन प्रदेश प्रमुख तथा कार्यक्रमके बर्का पहुना नजिर मियाँ करल रहिट ।
पत्रिकाके सल्लाहकार मण्डलमे कलेजके प्रवन्ध निर्देशक शिवहरी मुडभरी, डा. हेमराज पन्त, चिफ एडिटर सुशिला मल्ल लगायतके टीम रहल बावै ।
‘उच्च अनुशासन तथा दक्ष व्यवस्थापन, उत्कृष्ट शैक्षिक वातावरण तथा गुणस्तरीय शिक्षा’ कना मूल नारा सहित वि.स. २०५७ सालमे स्थापना हुइल कलेज अब्बे विज्ञान व्यवस्थापन तथा प्रविधिके पठन पाठनसे सर्वाङ्गीण विकासके लाग गन्तब्य शिक्षालयके रुपमे चिन्हजाइठ् ।
कलेज विश्व विद्यालय अनुदान आयोग (यूजीसी) से निर्धारित संस्थागत गुणस्तरके टमान चरण पार कैटी राष्ट्रिय तथा अन्राष्ट्रिय जगतमे सम्मान ओ उपलब्धिके सूचक गुणस्तर सुनिश्चितता तथा प्रत्यायन (क्यूएए) फेन प्राप्त कैटी पोखरा विश्व विद्यालयसे सम्बन्धन प्राप्त निजी क्षेत्रमे पहिल हुइ पुगल बावै ।
नाष्टमे कक्षा ११ ओ १२ ओर विज्ञान ओ व्यवस्थापन, स्नातक ओर बीइ कम्प्युटर, बीसीए, बीबीए, बीइ सिभिल ओ स्नाकोत्तर ओर एमबीएसमके पह्राइ हुइटी रहल बावै ।
हाल नाष्टमे कक्षा ११ ओ १२ मे एक हजार १५०, स्नातक तहमे ७७० ओ स्नाकोत्तर तहमे ११ विद्यार्थी अध्ययनरत रहल बाटै । कलेजमे ५१ जाने प्रध्यापक ओ ३९ जाने कर्मचारी रहल बाटै ।