धनगढी, २२ चैत । आपन वार्षिकोत्सवके अवसर पारके होटल पौवासे निःशुल्क ‘स्वादोत्सव’ कार्यक्रम आयोजना कैना जनैले बावै ।
शुकके रोज धनगढीमे पत्रकार सम्मेल कैके स्वादोत्सव कार्यक्रमबारे जानकारी कराइल हो । होटल पौवाके धनगढी शाखाके महाप्रवन्धक महेश सिंह होटलके नऔं वार्षिकोत्सवके अवसर पारके यहे चैत २५ गतेसे २९ गतेसम पौवाके सक्कु शाखामे ‘स्वादोत्सव’ हुइना हुइल जानकारी डेलै । उहाँ नेपालभर रहल सक्कु १८ शाखामे एकसाथ ‘स्वादोत्सव’ हुइना जानकारी डेहल हुइट ।
‘जहाँसे आतिथ्यके सुरुवात हुइठ’ कना मूल मन्त्रके साथ नेपालके लाग नेपाली हस्पिटालिटीसहितके सेवा डेटी रहल पौवा यी बरस नऔं वार्षिकोत्सव मनैटी रहल बा ।
स्वादोत्सवमे नेपाली स्वाद संस्कृति झल्कना मौलिक खानाके प्रस्तुति रहना समेत महाप्रवन्धक सिंह जानकारी डेलै ।
यी स्वादोत्सवके माध्यमसे होटल पौवा नेपाली स्वाद, संस्कृति ओ आतिथ्य संस्कारहे राष्ट्रिय तथा अन्तर्राष्ट्रिय स्तरमे चिन्हैना लक्ष्य रहल जनाइल बा । स्वादोत्सवमे पहुनाहुकनके डेहल प्रतिक्रियासे सेफहुकनके अनुभवमे निख्खरता आके क्षमता अभिबृद्धि करना मद्दत पुग्ना विश्वास पौवा लेले बा । यी उत्सवके औरे महत्वपूर्ण लक्ष्य कलेक स्थानीय किसानके खाद्य एवं तरकारीहे प्रोत्साहन समेत करना हो ।
उत्सवमे भाग लेहक लाग सक्कु शाखासे दुई लाख स्थानीय तथा बाह्य पाहुनाहुकनहे भेट कैके निउटा डेहल जनाइल बा । उ सक्कु पहुनाहुक्रनहे पौवामे आके खानाके स्वाद लेहेक लाग महाप्रवन्धक सिंह आग्रह फेन करले बाटै ।
ओस्टके, लावा बरस अवसरमे धनगढीमे रहल होटल पौवासे लावा बरसके पूवर्वसन्ध्यामे विविध सांगीतिक कार्यक्रम करना समेत जनैले बावै । चैत ३१ गते साँझके हुइना कार्यक्रममे थारु संस्कृतिमे आधारित सांगीतिक कार्यक्रमसे सुरु हुइना ओ राष्ट्रिय कलाकार तथा स्थानीय कलाकारहुक्रे मनोरञ्जनके कार्यक्रम रहना जनाइल बा ।
विश्व शान्तिके दूत गौतम बुद्धके जन्मस्थल लुम्बिनीसे यात्रा सुरु हुइल होटल पौवामे हाल सात सय ढेर जाने प्रत्यक्ष रोजगारी प्राप्त करल होटल पौवाके ब्राण्डिङ प्रमुख विष्णु भण्डारी जानकारी डेलै ।