१४ फाल्गुन २०८०, सोमबार February 26, 2024

तलब भत्ताके माग कैटी कैलारीके स्वास्थ्यकर्मीसे ज्ञापनपत्र

८ बैशाख २०८०, शुक्रबार
तलब भत्ताके माग कैटी कैलारीके स्वास्थ्यकर्मीसे ज्ञापनपत्र

हसुलिया । तलब भत्ताके माग करटी कैलारीके स्वास्थ्यकर्मी विफेक रोज ज्ञापनपत्र बुझैले बटैैं ।
तलब भत्तालगायत तीन बुँदे मागसहित कैलारीके स्वास्थ्यकर्मीहुक्रे गाउँपालिका अध्यक्ष राजसमझ चौधरीहे ज्ञापनपत्र बुझाइल स्वास्थ्य शाखा प्रमुख नरेशकुमार चौधरी बटैलै । स्वास्थ्यकर्मीहुक्रे विगत ३ महिनासे पैना बाँकी रहल तलव भत्ता यथाशिघ्र पाई पर्ना, चालु आर्थिक बर्षके बाँकी तलव यथाशिघ्र व्यवस्थापन करे पर्ना साथे आगामी आ.व. २०८०/०८१ के लाग संघीय सरकारसे बजेट व्यवस्थाहुके नइआइटसम मासिक रुपमे स्थानीय तहसे तलव भुक्तानीके ग्यारेन्टी हुइना करके अइना बजेट बनाई पर्ना, गाउँपालिकाके और कर्मचारी सरह सक्कु स्वास्थ्यकर्मीहुकनहे इन्धन, खाजा लगायत और प्रोत्साहन उपलब्ध कराई पर्ना, स्वास्थ्य संस्था संचालन तथा व्यव्स्थापन खर्च स्वास्थ्य संस्थाहे अविलम्ब उपलब्ध कराई पर्ना माग करके ज्ञापनपत्र बुझाइल उहाँ बटैलै ।


स्वास्थ्यकर्मीसे ज्ञापनपत्र बुझैटी दवावमुलक कार्यक्रमफे सार्वजनिक करले बटै । दवावमुलक कार्यक्रममे कैलारी गाउपालिका अन्तर्गतके सक्कु कर्मचारी बैशाख १० गतेसे १५ गतेसम करिया पट्टी बाँंधके काम कैना, माग सम्बोधन नहइलेसे बैशाख १५ गतेसे अत्यावश्यक सेवा वाहेकके सक्कु सेवा बन्द कैना ओ गाउपालिकमे हाजिरहुके धर्ना डेना कहल बा ।
दबावके और कार्यक्रममे मासिक रुपमे पेश करे पर्ना वा अनलाईन इन्ट्री करे पर्ना प्रतिवेदन नइकैना, १५ गतेसे गाउँपालिका अन्तर्गतके स्वास्थ्य ओरसे कौनोफे कार्यक्रम तथा तालिम, गाष्ठी, समिक्षामे सहभागी नइहुइना कहल बा । मागप्रति बेवास्ता करलेसे थप आन्दोलनक कार्यक्रम क्रमश सार्वजनिक करटी जैना सिनियर शाखा प्रमुख चौधरी बटैलै ।
स्थायी स्वास्थ्यकर्मीहुक्रे विगत ३ महिनासे तलब भत्ता नइपाइल ओरसे पारिवारिक अवस्था, दैनिक घर खर्च, बालबच्चाके पढाई लेखाइ लगायत सक्कु अवस्था दिन प्रतिदिन दयनीय बन्टी गैल कैलारी गा.पा. स्वास्थ्य शाखाके सिनियर अहेव अधिकृत विरेन्द्र प्रसाद सापकोटा बटैलै ।
ज्ञापनपत्र प्रमुख प्रशासकीय अधिकृत, प्रमुख जिल्ला अधिकारी, स्वास्थ्य कार्यालय कैलाली, कैलारी गाउपालिकाके १ से ९ समके वडा अध्यक्षहुकनहे बोधार्थ पठाइल बा ।