३२ असार २०८१, सोमबार July 15, 2024

प्रयोगविहीन धनगढी सिटीहल

२८ चैत्र २०७९, मंगलवार
प्रयोगविहीन धनगढी सिटीहल

धनगढी । कैलालीके धनगढी उपमहानगरपालिका–८ मे निर्माण करल सिटी हल भवन निर्माण सम्पन्न हुइल १० महिना बित्लेसे फेन प्रयोगमे आइ सेकल नैहो । तयार हुइल सिटी हल सञ्चालन कैना निर्देशिका नैबनके प्रयोगमे आइ सेकल नैहो ।
सङ्घीय योजना कार्यान्वयन ईकाइ कार्यालय धनगढीसे केन्द्रीय विभागसे हल सञ्चालनके लाग स्थानीय तहहे हस्तान्तरण कैना निर्णय बाँकी रहल ओरसे प्रयोगमे आइ नैसेकल जनैले बा । २८ करोडमे निर्माण हुइल सिटी हल प्रयोगमे नैलानके अब्बे ताला ठोकल बा । सुदूरपश्चिमके व्यापारिक, राजनीतिक ओ अन्य दृष्टिकोणसे फेन केन्द्रके रुपमे रहल धनगढीमे बैठक, सभा, गोष्ठी, सेमिनार जैसिन बरवार कार्यक्रम कैना स्थानके आवश्यकता महसुस कैके उक्त भवन बनाइल हो । भवन निर्माणके लाग सङ्घीय योजना कार्यान्वयन ईकाइमार्फत् २०७५ सालमे निर्माण कम्पनीसँग सम्झौता कैके काम आघे बह्रल रहे ।


उहे अनुसार २०७६ सालसे उक्त सिटी हल निर्माणके काम सुरु हुइल रहे । २८ करोड खर्च हुइल उक्त भवन निर्माण २०७९ असारमे सम्पन्न हुइल सङ्घीय योजना कार्यान्वयन ईकाइ कार्यालय धनगढी जनैले बा । सिटी हलके रेखदेख निर्माण कम्पनी एक जना चौकीदार रख्लेसे फेन निर्माण हुइल भवनमे भर ताला लगाइल बा । उक्त हलमे ९ सय जाने अट्ना क्षमता रहल अडिटोरियम हल, २ सय जाने अट्ना क्षमताके सेमिनार हल, एक प्रदर्शनी कक्ष, एक अति विशिष्ट कक्ष, २ रियल्सन हल ओ अन्डरग्राउन्ड पार्किङ सहितके सिटी हल निर्माण होसेकल बा ।