६ चैत्र २०८०, मंगलवार March 19, 2024

जोशीपुरके बरघर भल्मन्साहे कानुन तथा मानव अधिकारबारे सचेतना

१० चैत्र २०७९, शुक्रबार
जोशीपुरके बरघर भल्मन्साहे कानुन तथा मानव अधिकारबारे सचेतना

जोशीपुर । कैलालीमे अब्बे फेन स्थानीय न्यायिक समितिके न्यायसम्पादन प्रक्रियामे अगुवा भल्मन्सा, बरघर सहयोगी भूमिका खेल्टी आइल बाटै । उहाँहुक्रे परम्परागत सामाजिक न्यायमे सक्रिय रहल बाटै । मने उहाँहुक्रनहे कुछ न्यायक जटिलता अइना एक कार्यक्रमके सहभागिहुक्रे बटैले बाटै ।
दुरपश्चिम प्रदेश आन्तरिक मामिला तथा कानून मन्त्रालयके आर्थिक सहयोगमे थारु कल्याणकारीणि सभा कैलालीसे आयोजना करल बरघर, भल्मन्सा, सुढेनी, चिराकी गुरुवाहे एक ठाउँमे भेला कैके कानून तथा मानव अधिकारबारे सचेतना कार्यक्रम करगैल रहे ।
कार्यक्रममे कैलालीके ढेर जैसिन स्थानीय पालिकामे न्यायिक समितिसे फेन न्याय सम्पादन प्रक्रियामे भलमन्सा ओ बरघरके सहयोग लेना करल सहभागिहुक्रनके कहाइ रहे ।
स्थानीय न्यायिक समिति ऐनसे तोकल विषय वा विवादमे पक्ष, विपक्ष डुनु जनहनहे आमुन्नेसामसन्ने राखके छलफल कैना ओ मेलमिलाप करैना भलमन्साहुक्रनके भुमिका रहलेसे फेन उहाँहुक्रनहे काम कैना क्रममे कुछ कानूनी जटिलता अइना बटाइल रहिट ।
उहे सन्दर्भमे अधिवक्ता जोहारीलाल चौधरी गाउँके अगुवा, भल्मन्सा गुरुवा लगायत का कैसिन मुद्धामे सहजीकरण कैना कना विषयमे जानकारी डेहल रहिट । उहाँ फौजदारी मुद्धामे भल्मन्साहुक्रे सहजिकरण नैकैना अुनुरोध समेत करल रहिट ।
भल्मन्साहुक्रे फौजदारी मुद्दा बाहेक गाउँघरमे सिर्जना हुइना विवादके समाधानके लाग फेन संविधानके ऐनहे मध्यनजर कैके सहजीकरण करे पर्ना बटाइल रहिट । साथे कैसिन मुद्धामे संविधानसे कैसिन कानून निर्माण करले बा कना बारेम फेन जानकारी डेहल रहिट ।
ओस्टके राष्ट्रिय मानब अधिकार आयोग सुदूरपश्चिम प्रमुख हरि ज्ञवाली मानव अधिकार, सिद्धान्त, अधिकारके वर्गिकरण, संबैधानिक व्यवस्था, राज्यके दायित्व लगयत विषयमे सहजीकरण करल रहिट ।
कार्यक्रममे इन्दु थारु समसामयिक साँस्कृतिक, सामाजिक अवस्था ओ नेतृत्व विकासके बारेम सहजीकरण करल रहिट कलेसे थारु नागरिक समाजके दिलबहादुर चौधरी भल्मन्साके बारे कार्यपत्र प्रस्तुत करल रहिट ।
कार्यक्रममे जोशीपुर गाउँपालिकाके अध्यक्ष चित्रबहादुर चौधरी, उपाध्यक्ष रेखादेवी कठरिया, थारु कल्याणकारिणी सभाके केन्द्रीय सदस्य प्रभात चौधरी, रामचरण चौधरी, थारु नागरिक समाजके बसन्ती चौधरी, आर्थिक मामिला तथा कानुन मन्त्रालयके लेखा अधिकृत महेश चौधरी लगायतके सहभागिता रहल रहे ।