हसुलिया, १ फागुन । ३०औँ जनयुद्ध दिवसके अवसरमे कैलारीके हसुलियामे वृहत रक्तदान कार्यक्रम ओ फुटबल प्रतियोगिता आयोजना करगिल बा ।
कैलारी सहिद स्मृति प्रतिष्ठान नेपाल हसुलियाके आयोजना तथा नेपाल रेडक्रस सोसाइटी रक्तसंचार सेवा केन्द्र, धनगढीके प्राविधिक सहयोगमे रक्तदान कार्यक्रम आयोजना करगिल हो । रक्तदान कार्यक्रममे ४६ जाने रक्तदान करल कैलारी सहिद स्मृति प्रतिष्ठान नेपालके अध्यक्ष बतासु चौधरी जानकारी डेलै । गाउँघरमे खास कैके थारु समुदाय सिकलसेल रोगसे प्रभावित रहल ओ रगतके आवश्यता पर्ना हुइल ओरसे रक्तदान कार्यक्रमके आयोजना करल अध्यक्ष चौधरी बटाइल रहिट ।

उहे बिच प्रथम शहिद स्मृति कप फुटबल प्रतियोगिता फेन आयोजना करल बा । ‘स्वास्थ्यके लाग खेलकुद, राष्ट्रके लाग खेलकुद’ कना मूल नारा सहित सुरु हुइल फुटबल प्रतियोगिताके उद्घाटन नेकपा माओबादी केन्द्रके केन्द्रीय स्थायी कमिटी सदस्य तथा सुदुरपश्चिम सभा सदस्य खगराज भट्ट उद्घाटन करल रहिट । कार्यक्रमके बर्का पहुना समेत रहल उहाँ सहिदके परिवारहे सम्मान फेन करल रहिट ।
कार्यक्रममे संविधान सभा सदस्य बीरमान चौधरी, खेम बम, नेकपा माओवादी केन्द्रके केन्द्रीय सदस्य सम्झना चौधरी (सरु), नेकपा माओवादी केन्द्र प्रदेश कमिति सचिवालय सदस्य उर्मिला चौधरी, परशुराम चौधरी(मिसन), नेकपा माओवादी केन्द्र कैलारी गाउँपालिका सचिव लक्ष्मी सत्गौँवा लगायतके उपस्थिति रहल रहे ।

फागुन ५ गतेसम चल्ना प्रतियोगिताके लाग १६ टीमके सहभागिता रहल बा । प्रतियोगिताके प्रथम पुरस्कारमे नगद १५ हजार सहित ट्रफी, मेडल ओ प्रमाणपत्र रहल बा । ओस्टके डुसरा पुरस्कारमे नगद नौ हजार सहित ट्रफी, मेडल ओ प्रमाणपत्र रहल अध्यक्ष चौधरी जानकारी डेलै ।
रक्तदान तथा फुटबल प्रतियोगिताके प्रायोजकमे कैलाली जिल्ला खेलकुद समिति, कैलारी गाउँपालिका, नव जीवन सहकारी धनगढी, निसर्ग हस्पिटल एण्ड रिसर्च सेन्टर प्रालि, कैलाली हस्पिटल, युनिक सिड कम्पनी प्रालि, पाथीभारा डिष्टीबिउटर प्रालि, न्यूकृषक सेवा, मंगल दिप कृषि फर्म, मृग गार्मेन्ट उद्योग ओ सिंह जनरल स्टोर धनगढी रहल बा ।