हसुलिया, २६ पुस । कैलारी गाउँपालिकाके दिपेन्द्र माविके खेलकुद मैदानमे विफेक रोजसे १५औं राष्ट्रपति रनिङ शिल्ड प्रतियोगिता सुरु हुइल बा ।
कैलारी गाउँपालिका शिक्षा, यूवा तथा खेलकुद विकास शाखाके आयोजनामे उ प्रतियोगिता सुरु हुइल हो । कैलारी गाउँपालिकाके अध्यक्ष राजसमझ चौधरीके अध्यक्षतामे सुरु हुइल उदघाटन कार्यक्रममे सम्बोधन करटी उहाँ स्वास्थ्य तथा अनुशासनके लाग खेलकुद महत्वपूर्ण रहल बटैैलै ।

अब्बे मावि स्तरीय खेलकुद प्रतियोगिता हुइटी रहल ओ आघे बह्रना भारी अवसर रहल बटैलै । उहाँ कहलै, ‘गाउँपालिकासे खेलकुद विकासके लाग प्रत्येक बरस बजेट विनियोजन करटी रहल ओरसे यहाँ सहभागी खेलाडीहुक्रे जिल्ला स्तरीय खेलकुद प्रतियोगितामे सहभागीहुके स्वर्ण पदक जिटलेसे पचास हजार नगद पुरस्कार प्रदान कैना उहाँ घोषणा करलै ।
कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी खेलकुदहे विवादरहिट बनैना आग्रह करली । उहाँ कहली,‘गैल बरस हुइल खेलकुद प्रतियोगितामे टमान गुनासा आइल रहे । यी बरस विवादरहिट खेलकुद सम्पन्न कैबी । सहभागी विद्यार्थीनहे हदबन्दी नैलगाके उमेर अनुसार खेलकुदमे सहभागी करैनाफे उपाध्यक्ष आग्रह करल रही ।

यूवा तथा विद्यार्थीहुकन थेन ढेर प्रतिभा हुई सेकठ, उ प्रतिभाहे बाहेर ल्यन्ना अइसिन मेरके प्रतियोगिताके भारी योगदान रहठ ।’
कार्यक्रममे दिपेन्द्र माविके प्रअ विनोद भट्टराई प्रतियोगिता संचालन करेक लाग खर्च ढेर हुइना ओरसे विद्यालयसे विद्यार्थी ल्यानासे लेके प्रतियोगितामे सहभागी करैना समस्या हुइल बटैलै ।

कार्यक्रममे स्वागत मन्तव्य कैलारी गाउँपालिका शिक्षा, यूवा तथा खेलकुद विकास शाखा प्रमुख गणेश प्रसाद मिश्र करल रहिट ओ संचालन सामाजिक विकास शाखा प्रमुख यगम कलेल करल रहिट । कार्यक्रममे प्रमुख प्रशासकीय अधिकृत खगेन्द्रराज जोशी, कैलारी गाउँपालिका वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, कार्यपालिका सदस्य सुन्दरी चौधरी, लालबहादुर विक, टमान विद्यालयके विद्यालय व्यवस्थापन समितिके अध्यक्ष, प्रअ, खेल शिक्षक, कैलारी गाउँपालिकाके टमान शाखाके प्रमुखहुकनके सहभागिता रहे । प्रतियोगिता पुस २७ गतेसम संचालन रना बा ।