१९ फाल्गुन २०८०, शनिबार March 2, 2024

सामाजिक विकृति हटाइकलाग सडकनाटक

११ माघ २०७९, बुधबार
सामाजिक विकृति हटाइकलाग सडकनाटक

सागर कुस्मी
बर्दिया । बाल विवाह, लैंगिक हिंसा ओ लागु औषध सम्बन्धि जनचेतनामूलक सडकनाटक “सृष्टि”के मन्चन हुइल बा ।

बर्दियाली थारु कलाकार मन्चसे तयार पारगैल ओ ठाकुरबाबा नगरपालिका वडा नम्बर ५ के आयोजना ओ व्यवस्थापनमे उ जनचेतनामूलक सडकनाटक “सृष्टि” मन्चन हुइल हो । सडकनाटक ठाकुरबाबा नगरपालिकाके वडा नम्बर ५ के कैयो ठाउँमे डेखागैल बा ।

अब्बेके समयमे बर्दिया, बाँके जिल्लामे बाल विवाह, लैंगिक हिंसा ओ लागु औषध एकदम बर्हटी गैल ओर्से अइसिन गलत कामहे रोकक लाग इ नाटक डेखैना जरुरी रहल बर्दियाली थारु कलाकर मन्चके सचिव महेशराम थारु बटैलाँ ।

उहाँ कलाँ, सामाजिक विकृति ओ कुसंस्कारके अन्त्य करि, सभ्य शान्त ओ समृद्ध समाजके निमार्ण करि कना मुल नाराके साथ अइसिन अभियान चलैले बटि । इ सडकनाटकसे हमार समाजमे कुछ साकारात्मक बड्लाउ लानी कहिके नाटक मार्फत अइसिन परगाके सुरुवात करले बटि ।

बर्दियाली थारु कलाकर मन्चके अध्यक्ष मस्तराम थारु कलाँ, हमार समुदायमे अझ्कलके लर्का छोट उमेर पर्हटी पर्हटी भोज कैलेठाँ, उमेर बिना पुग्ले उर्हरके चलजैठाँ ओहेमारे पाछे जाके दुख नापाइँट ओ स्वास्थ्यमे कुछ असर नापरिन कहिके हम्रे अइसिन कडम उठैले बटि ।
कुछ समय एहोंर बर्दिया जिल्लामे ढेर बाल विवाह हुइल बिल्गाइठ । भरखरके लौंडीलौंडा मन परिक पर्ना हुइटीकिल डाइबाबनके बिना सल्लाह उर्हर जैना काम जेडा हुइटी गैल बा । जिहिसे हमार समाजमे विकृति, कुसंस्कार ओ लागु औषध फेन फैलटी गैल बा ।

सडकनाटक मन्चनके लाग बर्दियाली थारु कलाकार मन्च इ काममे ढेर भुमिका खेल्टी गैल बा । नाटक मन्चनमे सुनिता चौधरी, अर्जुन निमनकुस्मी, दयाराम चौधरी, बिना थारु, सत्यनारायण थारु ‘फेटारा’, महेश राम थारु ‘प्यारा’, शक्ति चौधरी, मस्तराम थारु ‘मस्ते बर्दियाली’, बिपना चौधरी लगायतके पात्र ओइनके ओजनडार भुमिका खेल्ले बटाँ ।

बर्दियाली मिडिया स्टुडियो बर्दियामे रेकर्डिङ हुइल “सृष्टि” सडकनाटकके कथा लेखन अर्जुन निमनकुस्मी, शक्ति चौधरी, डाइलग लेखन महेशराम थारु, मिकसिङ्ग मस्तराम थारु कैले बटाँ कलेसे नाटक निर्देशन मोडेल सुनिता चौधरी कैले बटाँ । इ बर्दियाली थारु कलाकार मन्च अस्टे अस्टे टमान सामाजिक काम कैटी आइल बा ।