सागर कुस्मी
धनगढी । कंचनपुर जिल्लाके कृष्णपुर नगरपालिका ८ मज्गैं कि थारु भल्मन्सन थारु संस्कृति बचाउ अभियानमे लागल बटैं ।

थारु समुदायके बर्का टिहुवार माघके सुभ मौका पारके थारु समुदायके लोकसंस्कृति कार्यक्रम कैनामे हिरगरके लागल बटैं । अब्बे माघ टिहुवार सबके घर अंगनामे माघके रमझम सुरु होगैल बा ।

वडा नम्बर ८ मज्गैं, राजघाट, बिचवा ओ शान्तिपुर के थारु भलमन्सन अझ्कल माघ विशेष कार्यक्रम करक लाग मन्के सामाजामा कर्टी बटैं । मघौटा, सखिया, झुमरा ओ आधुनिक नाचगान डेखाइक लाग कस्के लागल मज्गैंके भलमन्सा जगतराम चौधरी बटैलैं ।

’थारु लोकसंस्कृति संरक्षण सम्बर्द्धन कैना ओ लावा पुस्टनहे संस्कृति हस्तान्तरण कैके थारु लोकसंस्कृति बचैनामे लागल बटि’, उहाँ कहलैं, अब्बे पुरान पुस्टा बिट्टी गैलक ओर्से लावा पुस्टनहे संस्कृतिओर झुकाब होए कना हिसाबसे माघ विशेष कार्यक्रमके सुरुवात करले बटि ।

उहाँ अन्सार थारु समुदाय संस्कृतिमे सबसे धनी बा । मने थारुन्के संस्कृति दिन दिने लोप हुइटी गैल बा । जिहिसे हमार लोक संस्कृति फेन धराप अवस्थामे बा । कैयों संस्कृति लोप होसेकल बा ।

माघ विशेष कार्यक्रममे पुर्ख्यानी गीतबाँस, ढमार, मागर, चर्चित गायक राजु चौधरी राज ओ राम कुमार कठरियाके फेन विशेष प्रस्तुती रहना आयोजक जनैले बा । एकर संगे स्थानीय लौडीलौडनके मेरमेराइक नाचगान फेन डेखे पैना व्यवस्था रहना कार्यक्रम व्यवस्थापक रामु कुस्मी बटैलैं ।

यहाँ थारु समुदायमे हरेक साल भलमन्सा चुन्जाइठ । लावा भलमन्सनहे गाउँ समाजके काम करक लाग सिख्टी होजाइठ । ओहे ओर्से अगामी दिनमे दीर्घकालीन योजना बनाके भलमन्सा लोगनहे गाउँ समाज कार्यमे सजिल होए असिन कार्यक्रमके आयोजना करल जगत राम चौधरी बटैलैं ।

कुछ समय एहोंर गाउँक भलमन्सा, बरघरिया, महटावाँ लोग ढेर सक्रिय हुइटी गैल बटैं । गाउँ समाजके कार्य समयमे हुइटी गैल फेन बिल्गाइठ ।
समय अन्सार गाउँक नेतृत्वमे युवा लोग फेन आकर्षित हुइल बटैं । बहुटसे गाउँक भलमन्सा युवा लोग जिम्मेवारी समहँर्टी आइल बटैं । कैलारी ३ मोहनपुर गाउँक भरखरके युवा रामप्रसाद चौधरी गाउँ चलैटी बटैं ।

कृष्णपुर नगरपालिका वडा नम्बर ८ कार्यालयके आर्थिक सहयोगमे कार्यक्रम हुइना व्यवस्थापक रामु कुस्मी जानकारी डेलैं । पाछेक समयमे कंचनपुरके थारु गाउँ थारु सांस्कृतिक कार्यक्रम ढेर हुइटी गैल बा । जिहिसे थारु समुदायके गीतबाँस रीतिरिवाज, चालचलन, परम्परा, साहित्य, कला, संस्कृति संरक्षण सम्बर्द्धनमे टेवा पुगल बा ।

अझ्कल गाउँ गाउँमे हुइना माघ मिलन कार्यक्रमसे युवा पुस्टा उत्साहित हुइल बटैं कलेसे संस्कृति बचाइ परठ कना सकारात्मक बिचार फेन आइल मज्गैंके युवा साहित्यकार सुमित रत्गैंयाँके कहाइ बा ।

जा जैसिन हुइलेसे फेन आब थारु समुदायके भासा, साहित्य, कला, संस्कृति दिन दिने आघे बर्हटी गैल बा । थारु समुदायके बुद्धिजीवी, करम्चारी, सुभ चिन्तक सक्कुहुनके सुस्वास्थ्यके कामना व्यवस्थापक रामु कुस्मी जानकारी डेलैं ।