२० माघ २०७९, शुक्रबार February 3, 2023

‘भाषा, कला संस्कृति संरक्षण कैना सबके दायित्व हो’

२५ पुष २०७९, सोमबार
‘भाषा, कला संस्कृति संरक्षण कैना सबके दायित्व हो’

धनगढी । थारु भाषा, कला, संस्कृति संरक्षण तथा सम्बद्र्धनके लाग सुदूरपश्चिम प्रदेश सरकारसे सहयोगके लाग पहल कैना प्रदेश सभा सदस्य जानकी पौडेल कुँवर बटैले बाटी ।
सोम्मारके कैलालीके गौरीगंगा नगरपालिका–१० मे आयोजना हुइल नुक्लिपुर महोत्सवके उद्घाटन कैटी प्रदेश सभा सदस्य पौडेल थारु भाषा, कला संस्कृति संरक्षण सम्वद्र्धनके लाग आपन ओरसे सेक्ना पहल कैना बटाइल रही ।
कार्यक्रमके बर्का पहुना समेत रहल उहाँ भाषा, कला संस्कृति नै व्यक्ति अथवा समुदायके पहिचान रहल कहटी उहीहे संरक्षण सम्वद्र्धन कैना सबके दायित्व रहल बटैली ।
‘कौनो फेन व्यक्तिके भाषा, कला संस्कृति उ व्यक्ति समुदायके पहिचान हो, उहीहे संरक्षण सम्बद्र्धन कैना सबके दायित्व हो’, उहाँ कहली–‘यकर इ सक्कु चीज संरक्षण सम्बद्र्धनके लाग प्रदेश सरकारहे मोर ओरसे विशेष पहल रही ।’
आपन गाउँठाउँके विकास तथा पार्यापर्यटनसे आर्थिक अवस्था सुधारके लाग चालल् कदम एकदमे सह्रानीय रहल बटैटी उहाँ महोत्सव आयोजक टीमहे धन्यवाद फेन डेहल रही ।
कार्यक्रमके खास पहुना गौरीगंगा नगरपालिकाका नगरप्रमुख देवीदत्त कडेल थारु कला संस्कृति संरक्षणके लाग नगरपालिकासे सहयोग कैटी आइल बटैलै । उहाँ टमान ठाउँमे देउथान निर्माण लगायत थारु समुदायके टमान कार्यक्रमके लाग नगरपालिकासे सहयोग कैटी आइल बटाइल रहिट । उहाँ अइना दिनमे फेन नगरपालिकासे सहयोग हुइना फेन बटाइल रहिट ।
कार्यक्रममे थारु कल्याणकारिणी सभाके केन्द्रीय सदस्य रामचरण चौधरी, जानकी गाउँपालिकाके पूर्व उपाध्यक्ष उमा महतो लगायत शुभकामना मनतब्य राखल रहिट ।
‘भाषाकला संस्कृति, जैविक विविधता संरक्षण ओ पर्यापर्यटन प्रवद्र्धन करि’ कना मूल नारा सहित पहिलचो आयोजना हुइल नुक्लिपुर महोत्सव २०७९ इहे पुस २५ से २९ गतेसम सञ्चालन हुइना जनाइल बा ।
कार्यक्रम होमस्टे व्यवस्थापन समितिके अध्यक्ष भागीराम चौधरीके अध्यक्षतामे हुइल रहे । कार्यक्रम समितिके सदस्य तथा मिडिया संयोजक दिनेश दहित करले रहिट ।
होमस्टेके प्रचारप्रसार, मौलिक हस्ताकला प्रवद्र्धन कैना उद्देश्य सहित महोत्सवके आयोजना करल जनाइल बा । महोत्सवमे रमाइलो मेला, थारु खानपानके सुविधा, हस्ताकला प्रदर्शनी तथा विक्री वितरण, खुला पुरुष फुटवल प्रतियोगिता, चर्चित थारु कलाकारनके प्रस्तुती, थारु गुरुवाहुक्रनके शक्ति प्रदर्शन, डल्लफमे जंगल सफारीके व्यवस्था रहल बा ।
२०७७ सालमे होमस्टे स्थापना लगट्टे कोरोना महामारी सुरु हुइलपाछे नुक्लिपुर सामुदायिक होमस्टेके विधिवत उद्घाटन हुइ नैसेकल रहे । महोत्सवसँगे होमस्टेके उद्घाटन फेन करगिल बा । नुक्लिपुरमे हाल ६ घरमे होमस्टे संचालन करल बा ।
गौरीगंगा नगरपालिका वडा नम्बर १० मे नुक्लिपुर गाउँ परठ् । इ गाउँके उत्तरओर उदासीपुर गाउँ, दक्षिणओर कैलारी गाउँपालिका वडा नम्बर ८ के भंगहा गाउँ, पूरुब ओर भगतपुर ओ सुन्दरपुर गाउँ परठ् कलेसे पश्छिउ ओर लक्ष्मी ओ सरस्वती सामुदायिक बन्वा परठ् ।
होमस्टे गाउँ तथा महोत्सवमे पुगलक लाग महेन्द्र राजमार्ग बढैपुर आर्मी व्यारेकसे ७ किलोमिटर दख्खिन ओ उदासीपुरके सरस्वती माध्यमिक विद्यालयसे १ किलोमिटर पश्छिउ बनुवा किनारमे अवस्थित रहल बा । ओस्टके हुलाकी सडक हसुलिया बजारसे १६ किलोमिटर उत्तर ओर इ गाउँ सुन्दर शान्त वातावरणमे अवस्थित रहल बा ।