२ बैशाख २०८१, आईतवार April 14, 2024

ठगीके नटवरलाल पक्राउ

२१ पुष २०७९, बिहीबार
ठगीके नटवरलाल पक्राउ

धनगढी । कैलालीमे टमान व्यक्तिहुक्रनहे ठगी करल आरोपमे एक जनहनहे प्रहरीले पक्राउ करले बा ।
जिल्ला प्रहरी कार्यालय कैलालीसे दार्चुला लेकम गाउँपालिका–१ बैठुइया ३५ वर्षीय पदमराज भट्टहे पक्राउ करल हो । उहाँहे बिफेक रोज धनगढी उपमहानगरपालिका–३ से पक्राउ करल हो ।
प्रहरीके अनुसार उहाँ ठगीके नटवरलाल हुइट । कैलाली, कञ्चनपुर लगायत सुदूरपश्चिमके टमान जिल्लामे उहाँ ढेर ठगी करल प्रहरीके कहाइ रहल बा । उहाँ विरूद्ध ढेर उजुरी आइलपाछे प्रहरी ओहकान खोजी कैके पक्राउ करल हो । कैलालीके एसपी देवेन्द्र पालके अनुसार उहाँ भाडाके गाडी चह्रिट । भाडामे लेहल गाडी ओ लावा कपडा लगाके उहाँ टमान व्यक्तिहे लोभ्याइट । ‘सुरूमे बैंक तथा संघ संस्थाके हाकिम हुँ कहिके लोभ्याइट । महंगा गाडी भाडामे लेना, अपने बरवार मनै हुँ कहिके प्रस्तुत हुइना डेखगैल,’ एसपी पाल कहलै ।
एसपी पालके अनुसार उहाँ एकल महिलाहे निशानामे राखिट । उहाँ बरवार मनै हुँ कहटी टमान बहाना बनाके महिलानसँग लग्गे हुइट ।‘विश्वास हुइलपाछे उहाा उ महिलासँग भोजके नाटक समेत कैना करल डेखगैल । ओइसीक करलपाछे उहाँ उ महिलाहुक्रनके टमान अश्लिल भिडियो समेत बनैना ओ फकाके हुइठ् कि कैसिक हुइठ् पैसा लेना करल भेटागिल,’ उहाँ कहलै, ‘ओकरपाछे पैसा लेके फरार हुइना ओहकान प्रकृति डेखगैल । २, ४ लाख जट्रा भेटाइल ओट्रा ठग्ना करिँट ।’
ओस्टके उहाँ ढेर ठगी करल प्रहरीके कहाइ रहल बा । यद्यपि अब्बेसम कै जनहनहे उहाँ ठगसेकल कना यकिन विवरण नैरहल एसपी पाल बटैलै । कार्यालयमे जाहेरी अइना क्रम जारी नै रहल उहाँ बटैलै । कैलालीमे किल नैहोके कञ्चनपुरमे समेत उजुरी परल बा । उहाँ ठगी मुद्दामे इहीसे आघे फेन पक्राउ परसेकल व्यक्ति हुइट ।
एसपी पालके अनुसार इहीसे आघे फेन दुई बरस ठगी मुद्दामे जेल समेत बैठसेकल बाटै । उहाँसे पीडित हुइल कोइ हुइलेसे प्रहरीके सम्पर्कमे अइना फेन कार्यालय अनुरोध करले बा ।