धनगढी, ३० बैशाख । नवजीवन सहकारी संस्थाके ३२ औं चुनावी बार्षिक साधारण सभामे संचालक समिति अध्यक्ष पदके उम्मेदवार घनबहादुर शाह आपन ८ बुँदे प्रतिबद्धता पत्रसहित प्यानल घोषणा करले बटै ।

मिडियाकर्मी समेत रहल अध्यक्ष पदके उम्मेदवार शाह कैलाली बहुमुखी क्याम्पसके पूर्व अध्यक्ष समेत हुइट । ओस्टके उहाँ नवजीवन सहकारी संस्थाके २ कार्यकाल सञ्चालक समितिमे फेन रहीचुकल बटै ।
ओहकान प्यानल ओर उपाध्यक्ष पदके उम्मेदवार ईश्वर प्रसाद जोशी रहल बटै । उपाध्यक्ष पदके उम्मेदवार जोशी ग्रामीण विकास बैंकमे अधिकृतके रुपमे १२ बरसके अनुभव, नवजीवन सहकारीके पूर्व उपाध्यक्ष समेत हुइट ।
शाह प्यानलके सदस्य पदके उम्मेदवारमे क्रमशः दिर्घ बहादुर शाह, धनञ्जय भट्ट, पवित्रा धिक्त पाण्डेय, लक्ष्मी नारायाण चौधरी, विक्रम विश्वकर्मा, विश्वनाथ ओझा ओ शिव कुमार जोशी फुलारा रहल बटै ।
शाहके प्रतिवद्धता पत्रमे संस्थाके हरेक गतिविधी पूर्ण रुपमे पारदर्शी बनैना, सदस्य केन्द्रित सेवा विस्तार, सुशासन ओ उत्तरदायित्व, क्षमता विकास, मोवाइल वैकिंग, उत्पादन ओ रोजगारी, सामाजिक उत्तरदायित्व ओ वित्तिय साक्षरता अभियान रहल बावै ।
अइना जेठ ९ गते हुइना सहकारी संस्थाके ३२ औं चुनावी बार्षिक साधारण सभाके लाग केशव राज मिश्र नेतृत्वके समूहसे १५ बुँदे प्रतिवद्धतापत्र सहित प्यानल घोषणा करसेकल बा । ओस्टके उहीसे आघे अध्यक्षके उम्मेदवार गोपालराज पाठकके समूहसे ९ बुँदे प्रतिबद्धता पत्र सार्वजनिक कैके आपन प्यानल घोषणा करसेकल बा ।