धनगढी, २७ चैत । चैतन्य पाठशाला धनगढीसे निःशुल्क क्षमता विकास अभियान घोषणा करले बा ।
धनगढी उपमहानगरपालिका वडा नम्बर ५ शिवनगर स्थित रहल पाठशालासे SEE डेहल विद्यार्थीनके सर्वागिङ्ग विकासहे लक्षित कैटी चैतन्य विद्यार्थी क्षमता विकास अभियान सञ्चालन कैना घोषणा करल हो ।
शिक्षा ओ संस्कारके संगम, वेद ओ विज्ञानके संयोजन ओ प्रकृति ओ संस्कृतिके सम्मानके रुपमे स्थापित पाठशालासे सामाजिक उत्तरदायित्व अन्र्तगत सञ्चालन करजैना उ अभियान मार्फत एक हजार विद्यार्थीनहे निःशुल्क तालिम कैना जनाइल बा । पाठशालाके अध्यक्ष गणेश जोशी विद्यार्थीनके व्यक्तित्व विकास, सीप अभिवृद्धि तथा भविष्य उन्मुख क्षमता विकासमे टेवा पुगैना उद्देश्यसे अभियान सञ्चालन करे लागल जानकारी डेलै ।
अभियान अन्र्तगत व्यक्तित्व विकास, सार्वजनिक वतृत्व कला, प्रस्तुतीकरण तथा नेतृत्व विकास, योग तथा ध्यान मार्फत मानसिक सन्तुलन, अंग्रेजी भाषा (सम्प्रेषण ओ लेखन) सूचना तथा सञ्चार प्रविधि अन्र्तगत कम्युटर, ग्राफिक डिजाइन, डिजिटल मार्केटिङ, भिडियो इडिटिङ तथा प्रोग्रामिङ रहल बा ।
ओस्टके आतिथ्यता(बेकरी, बारिष्टा, कुकिङ) ओ खेलकुद ओर फुटबल, क्रिकेट, बास्केटबल, तेक्वान्दो सम्बन्धी प्रशिक्षण प्रदान कैना जनाइल बा । सिमित सिटके कारण पहिल अउइयाहे प्राथमिकताके आधारमे सहभागिता कराजैना जनाइल बा । कार्यक्रममे सहभागिता हुइक लाग इच्छुक विद्यार्थी SEE डेहल प्रवेश पत्र, अभिभावकके नागरिकताके प्रतिलिपी तथा विद्यालयके सिफासिस पत्र पेश करे पर्ना रहल बा ।
उ अभियान २०८३ वैशाख ६ गतेसे चैतन्य पाठशालामे सञ्चालन हुइना फेन जनाइल बा ।