धनगढी, ५ चैत । दहित गोट्यार समाज कैलालीसे जिल्ला सम्मेलन तयारीके लाग बिफेक रोज धनगढी‐४ उत्तर बेहडीमे टमान विषयबस्तुमे छलफल कैगिल बा ।
समाजके जिल्ला अध्यक्ष दलबहादुर दहितके घरगोसियाइमे हुइल बैठक बैठल हो । बैठकसे दहित गोट्यारके जिल्ला सम्मेनल इहे चैत २१ गते शनिच्चरके रोज भजनी नगरपालिका वडा नम्बर ४ कुँरी गाउँमे कैना निर्णय करल बा ।
आपन गोत्र पहिचानके साथे थारु कला रीति संस्कृतिहे संरक्षण सम्बद्र्धन तथा पुस्तान्तरणके लाग दहित गोट्यार सम्मेनलके तयारी करल अध्यक्ष दहित बटैलै ।

उहाँ कहलै, ‘हमार रीति संस्कृति पहिचान हेरैटी गैल अवस्था रहल बा । उहीहे संरक्षण सम्बद्र्धन सहित पुरस्तान्तरणके लाग सम्मेलनके तयारी करल हो । सम्मेलनसे गोत्र पहिचान सहित थारु रीति संस्कृतिके बारेमे बुहत रुपमे छलफल कैके उहीहे दस्तावेजीकरण कैना जरुरी रहल बा ।’

बैठकमे सहभागीहुक्रे सक्कु थारुहुक्रे आपन गोत्र पहिचान करके रिति, संस्कृति, पहिचान संरक्षणमे लागल ओरसे दहित थारुहुक्रेफे आघे बह्रना जरुरी रहल बटाइल रहिट । उहाँ दहित थारुहुकनके अवस्था, घरधुरी ओ जनसंख्याके तथ्याङक रख्ना जरुरी रहल फेन बटाइल रहिट ।
सम्मेलनके लाग सक्कु गाउँसे एक÷एक जाने जिम्मेवार व्यक्तिहे जिम्मेवारी तोकल बा । उहाँहु्क्रे अपन गाउँमे समन्वय कैना, प्रचार प्रसार कैना ओ आर्थिक संकलनके जिम्मा रहल जनाइल बा । दहित गोट्यार समाजके लाग कोष स्थापना, सम्मेलनके लाग सदस्यता शुल्क÷सहयोग स्वरुप प्रतिघरसे पाँचसय रुप्या उठैना सल्लाहफे कैगिल बा ।