धनगढी, ३१ भदौ । सुदूरपश्चिम प्रदेशके मुख्यमन्त्री कमलबहादुर शाह नेतृत्वके टोलीसे जेनजी आन्दोलनके क्रममे क्षतिग्रस्त बनल सरकारी भौतिक संरचनाके निरीक्षण करगिल बावै ।
मुख्यमन्त्री शाहसहित मन्त्री ओ प्रदेश सरकारके कर्मचारीके टोलीसे संयुक्त रुपमे क्षतिग्रस्त सरकारी संरचनाके निरीक्षण करल हो । आन्दोलनमे जराइल ओ तोडफोड करल प्रदेश ओ संघीय सरकार मातहतके कार्यालय भवनके निरीक्षण करल रहे ।
निरीक्षणपाछे सञ्चारकर्मीहे प्रतिक्रिया डेटी मुख्यमन्त्री शाह जेनजी आन्दोलनके क्रममे अकल्पनिय घटना घटल ओ ढेर संरचनामे क्षति पुगल बटैलै । प्रदेश सरकारसे विषय परिस्थितिमे फेन सेवा सुचारुके लाग संयन्त्र परिचालन करल फेन उहाँ जानकारी कराइल रहिट ।
‘सेवा सुचारुके लाग कैसिन अवस्था बावै कना बारे जानकारी लेहक लाग निरीक्षणमे निकरल रही,’ उहाँ कहलै, ‘दुई–चार दिनभिटरे सक्कु सेवा सुचारु कैना तयारीमे बटी ।’
२४ भदौमे हुइल जेनजी पुस्ताके आन्दोलनके क्रममे प्रदेशके कैलाली, कञ्चनपुर ओ डडेल्धुरामे ढेर सरकारी भौतिक संरचनामे तोडफोड ओ आगजनीसे ढेर क्षति पुगल रहे । कैलालीमे क्षतिके प्रारम्भिक विवरण संकलन होसेकल बा । आन्दोलनके क्रममे कैलालीमे किल एक सय ३७ ठो भवनमे क्षति पुगल बा । छ सय ७८ ठो सवारीसाधन जराइल बा । ओस्टके जेनजी आन्दोलनमे सुदूरपश्चिमके पहाडी जिल्ला डडेल्धुरामे तीन करोडके क्षति पुगल बा ।
कञ्चनपुरके प्रमुख जिल्ला अधिकारी लक्ष्मण ढकालके अनुसार वहाँ सरकारी ओ निजी भवन सहित ३२ भवनमे प्रदर्शनकारीसे आगजनी ओ तोडफोड करले बटै ।