धनगढी, २० भदौ । कैलाली उद्योग वाणिज्य संघके ५१ औं साधारण सभा तथा चुनावी अधिवेशन २०८२ के लाग कोपिला कुँवर सचिव पदके लाग उम्मेदवारी डेले बटी ।
इहे भदौ २८ गते हुइना अधिवेशनके लाग उहाँ ‘पारदर्शी संघ, समृद्ध व्यवसाय‐युवा नेतृत्व’ कना मूल नारा सहित सचिव पदके लाग स्वतन्त्र रुपमे उम्मेदवारी डेहल हुइटी । धनगढीमे पत्रकार सम्मेलन मार्फत उहाँ उम्मेदवारी घोषणा सँगे १५बुँदे घोषणापत्र फेन जारी करले बटी ।

व्यवसायीके हकहितके संरक्षण, संवद्र्धन ओ प्रवद्र्धन सहित व्यवसायीहुक्रनके सुरक्षा ओ समृद्धिके प्रतिवद्धता सहित उहाँ उम्मेदवारी डेहल बटैली । उहाँ संघके दुई कार्यकाल कार्यसमिति सदस्य रहीके सक्रिय तथा व्यवसायीक हितमे लागल अनुभव बटैटी युवा तथा महिला उद्यमी तथा महिला फेन नेतृत्व तहमे जाइक लाग सक्षम बटै कना सकारात्मक सन्देश प्रवाह कैना उद्देश्यसे उम्मेदवार बनल बटैली ।
ओस्टके उहाँ अपने नेतृत्वमे अइलेसे संघमे हुइना आर्थिक क्रियाकलाप, सदस्य नविकरण लगायत क्षेत्रमे पारदर्शीता कायम कैना, संघमे हुइना अनिमियतता, विसंगती ओ वेथितीके अन्त्य कैटी सक्कु व्यापारीनके साझा ओ शसक्त संस्था बनैना बटैली ।
साथे उहाँ युवा उद्यमी तथा नवप्रवर्तनहे विकास एवं प्रवद्र्धन, उपभोक्त अधिकार संरक्षण तथा बजारमे गुणस्तरीय वस्तु तथा सेवा सुनिश्चित कैना, संकटमे परल व्यवसायीहुक्रनके व्यवस्थापनके लाग अक्षयकोष स्थापना, स्थानीय उत्पादनहे जोड डेना रहल बटैली ।