धनगढी, ६ जेठ । गोदावरी नगरपालिका वडा नं ८ के वडा भेलाके अवसरमे मझगाउँ थारु संग्रहालयसे नगर प्रमुख विरेन्द्र भट्टहे टमान माग समेटल ज्ञापनपत्र बुझैले बा ।

ज्ञापनपत्र मार्फत गोदावरी नगरपालिकासे थारु समुदायके भाषा, कला, संस्कृति, भेषभूषा ओ परम्परागत प्रणालीके संरक्षण तथा प्रवद्र्धनके लाग आवश्यक सहयोग करडेना आग्रह करटी ज्ञापन पत्र बुझाइल हुइट ।

ज्ञापनपत्रमे मझगाउँस्थित थारु संग्रहालयके प्रांगणमे विगत १४ वर्षसे माघ महोत्सव आयोजना हुइटी आइल बा । प्रारम्भमे पूर्व श्रीपुर गाविसस्तरीय रूपमे सुरु करल महोत्सव पछिल्ला ९–१० वर्षसे मझगाउँमे गोदावरी नगरस्तरीय रूपमे मनैटी आइल बा । उ महोत्सव स्थानीय कला, संस्कृति ओ पर्यटन प्रवद्र्धनमे महत्वपूर्ण योगदान डेटी आइल जनाइल बा ।

थारु समुदायमे परापूर्वकालसे चल्टी आइल भल्मन्सा, सोरहिनीया, गुरुवा, वैदुवा जैसिन परम्परागत प्रथाके संरक्षण करटी उहीहे कानूनी मान्यता डेना ओ व्यवस्थापन कैना माग फे ज्ञापनपत्रमे उल्लेख करल बा । माघ महोत्सवके लाग बजेट विनियोजन कैना, थारु संग्रहालय ओ मझगाउँ थारु सामुदायिक होमस्टेके प्रवद्र्धनके लाग आवश्यक सहयोग पुगैना माग करल बा । ज्ञापनपत्र थारु कल्याणकारिणी सभा गोदावरी नगर समिति, गोदावरी नगरस्तरीय बरघर भल्मन्सा समिति, ओ मझगाउँ थारु सामुदायिक होमस्टे समितिके संयुक्त पहलमे बुझाइल रहे ।