धनगढी, १३ पुस । परराष्ट्रमन्त्री डा. आरजु राणा देउवा कैलालीके चिसापानीमे निर्माण हुइ लागल जलपादेवी केबलकारके शिलान्यास करले बाटी ।
शनिच्चरके एक कार्यक्रमके बिच उहाँ चिसापानीसे राजकाँडासम सञ्चालन हुइना जलपादेवी केबलकारके शिलान्यास करल हुइटी । लम्की चुहा नगरपालिका–३ चिसापानी ओ मोहन्याल गाउँपालिका–७ राजकाँडामे निर्माण सुरु करल केबुलकारसे प्रदेशके पर्यटन क्षेत्रके विकासके लाग प्याकेज तयार हुइल बा ।

नेपाल उद्योग वाणिज्य महासंघके अध्यक्ष चन्द्रप्रसाद ढकाल ओ जिल्ला समन्वय समिति कैलालीके पूर्वसभापति सूर्यबहादुर थापाके समूहसे जालपादेवी केबुलकार निर्माण करे लागल हो । अध्यक्ष ढकाल चन्द्रागिरी केबुलकारके सञ्चालकसमेत हुइट । केबलकार परियोजनाहे एक बरसभित्रे सम्पन्न कैना लक्ष्य राखल बा । केबलकार निर्माणके लाग एक हजार आठ सय ढेर रुख्वा कटान होसेकल बा कलेसे २० बिगाह जग्गा फेन जालपादेवी केबुलकारके नाउँमे आसेकल जनाइल बा ।
थापाके अनुसार सात अर्ब रुपियाँके लगानीमे निर्माण हुइ लागल केबलकारके कूल लम्बाइ तीन दशमलब एक किलोमिटरके रहना बा । दश मिनेटके यात्रा दुरी रहना केबलुकारमे १५ ठो टावर ओ ३४ ठो गोन्डुला रहना मेरके डिपिआर निर्माण हुइल सञ्चालक थापा जानकारी डेलै ।
केबलकारके यात्रामे कर्णाली लडिया, जालपादेवी, कालभैरब, कालिकादेवी, कैलाश धामलगायतके धार्मिकस्थल, हात्ती ढुङ्गा लगायत पर्यटकीयस्थलके अवलोकन करे सेकजैना बा । केबलकारसे हुइना कूल आम्दानीके डुई प्रतिशत स्थानीय सरकारहे उपलब्ध करैना बटाइल बा ।
ओस्टके केबुलकारके निर्माणसँगे चिसापानीमे ५० बेड ओ राजकाँडामे एक सय बेड क्षमताके होटेल ओ सभाहल निर्माण कैना बटाइल बा । केबलकारके बटम स्टेशन कर्णाली चिसापानीमे रहना जनाइल बा । केवलकार सञ्चालनसे सुदूरपश्चिमके पर्यटन विकाससंगे आर्थिक उपार्जनमे समेत सहयोग पुग्ना अपेक्षा लेहल बा ।