सागर कुस्मी
धनगढी । कलाकार ओ मोडेल रीतु चौधरी थारु कला संगीत जगतममे लोकप्रिय बटैं । अब्बेसम उहाँ पचाससे ढेर म्युजिक भिडियोमे खेल सेक्ले बटैं ।

थारु कलाकार मन्से ढेर म्युजिक भिडियो खेल्ना कलाकारके रूपमे हुँकार नाउँ आइठ । अत्रा ढेर काम कैसेकल थारु कलाकार एकदम कम बटैं, इ क्षेत्रमे । रीतु जत्रा ढेर संघर्ष कैके अइना कमे मोडेल बटैं । ओहेमारे रीतुके अभिनय मजा बा ।

भारतमे जलम हुइलेसे फेन ओहकान खास बैठाइ टीकापुर कैलाली हो । अब्बे टीकापुरमे बैठके कला जगतमे अपन करियर स्थापित कैनामे संघर्ष हरदम कर्टी बटैं । मोफसलमे बैठके अइसिक चम्के सेक्ना हुँकार भारी खुबी हो ।

उहाँ कला क्षेत्रमे गोरा टेकल भर्खरै ५ बरस हुइटा । इहिसे पहिले इ क्षेत्रमे अइना कौनो रहर ओ चाहना नैरहिन । अचानक इ क्षेत्रमे अइलेसेफें अब्बे अपन रगतमे, नसा नसामे कलाकारिता छाँसेकल उहाँ बटैठैं ।

रीतु चौधरी चर्चित हुइनाजे कारण ओहकान इमानदारिता ओ कामप्रतिके निरन्तर अठोट ओ लगनशीलता हो । काममे हरदम ध्यान डेना, मेहनत कैना, मोडेलिङप्रति जिम्मेवार हुइना रितुके स्वभाव रहल ओर्से निर्देशक ओइनके नजरमे उहाँ परल बटैं । भरखरे राष्ट्रिय रुप लेटी थारु संगीत क्षेत्रमे अब्बे रीतु स्थापित मोडेल कलाकार होसेकल बटैं ।

पहिल गीत २१ औ सेन्चुरीसे अब्बेक म्युजिक भिडियोसम आइट सम स्तरीय अभिनय रीतुके पहिचान बनसेकल बा । थारु समुदाय उहकिनहे आब कलाकारके रूपमे चिन्हसेकले बा । यहाँसम आइटसम रितु कामसे सन्तुष्ट हुइल बटैठैं । ओहेमारे रीतु खुशीक अनुभुती हुइटी रहल बटैठैं ।

रीतु कठैं, मै अचानक इ क्षेत्रमे अइलुँ । अचानक अइलेसे फेन आब मोर लाग सक्कु बात कला जो हो । मै एक कलाकार मोडेल हुइटुँ । मोर परिचय कलक इहे हो । इ परिचय नाम, दाम, सम्मान, इज्जत डेले बा ।

उहाँ फेन कठैं, मै अभिन आकुर चम्कना चाहठुँ । सबके मन जिट्ना चाहठुँ । थारु ओ नेपाली सांगीतिक फँटुवामे हरदम चम्कना टोरैंयाँ बनके आघे बर्हना लक्ष्य लेके नेंग्टी रहल उहाँके कहाइ बा ।

सक्कु दर्शक लोगनके साथ, मैयाँ ओ हौसला पैलेसे अपन कलाहे आउर उप्पर लैजाइ सेक्ना रीतुके कहाइ बा । ओहेमारे उहाँ अपनहे चिन्हाँइक लाग हरदम दर्शक ओइनहे सम्झटी रहल उहाँके कहाइ बा ।