धनगढी । नेकपा एमालेके पोलिट्ब्युरो सदस्य नारदमुनी राना सत्ता गठबन्धन सरकारके आयु अगहन ४ गतेसम केल रहल बटैले बटै ।
कैलाली क्षेत्र नम्बर ५ से प्रतिनिधिसभा सदस्यके उमेदवार समेत रहल राना देशभर एमालेके लहर चलल कारण गठबन्धन सरकारके आयु ढेर नइरहल बटाइल हुइट । कैलाली क्षेत्र नम्बर ५ अन्तरगतके टमान टोल भेलाहुकनहे सम्बोधन करटी राना ५ दलिय गठबन्धनसे एमालेहे कौनो असर नइपरल दावी करल हुइट ।
गठबन्धनके नेताहुक्रे गठबन्धन करलै, मने एमालेसे जनतासंग गठबन्धन करल कारण यी सरकारके आयु अगहन ४ सम केल बा,’ राना कहलै ‘देशके पक्षमे ठरह्याइना, जनताके पक्षमे ठरह्याइना एक ठो पार्टी एमाले रहल कारण देश जोगाइक लागफे जनतासे एमाले रोज्ही, यी हम्रे गाउँ घरमे आइबेर प्रस्ट डेखल बा ।’
परमादेशी गठबन्धन सरकार देशमे आइलपाछे अदालत सेटिङमे चलल बा, उहाँ कहलै ‘जनताके योजना नइहुके मन्त्रालयसे बिचौलिया मार्फत कमिशन खाके योजना बनैठै, महंगीसे जनताके ढाड सेकल बा, किसान मल पैले नइहुइट, धानके मुल्य पैले नइहुइट, बैंकसे ऋण लेहे पैले नइहुइट ओ यिहे गठबन्धनसे जिटलेसे देश रही कहे सेक्जाई ?’

गठबन्धनके नेताहुक्रे प्रधानमन्त्री बना दि अपनेनके नागरिकहे नागरिकता डेबी कहिके भारत जाके लौटल बटै उहाँ कहलै ‘शेरबहादूर देउवा गोसिनीया आरजु राणा देउवा ओ प्रचण्ड भारतमे जाके नागरिकता डेना ओ अपनहे प्रधानमन्त्री बनैना सम्झौता करके आइल बटै, अनी प्रधानमन्त्री पदसंग नागरिकता बेच्न यी गठबन्धनहे अपनेहुक्रे मत डेना ?’

अब्बे टे देशभक्त राष्ट्रपति हुइल कारण नागरिकता बेच्नासे रोकल फेर गठबन्धनके सरकार बन्ना हो कलेसे सक्कु विदेशी नेपाली नागरिकता पैही राना कहलै ‘हम्रहिनहे पो देशके चिन्ता बा, नागरिकतासंग प्रधानमन्त्री पद साँट्न गठबन्धनके नेताहुकनहे पद हुइलेसे पुगल, जनता मरिट या बाँचिट, उ कारण जनताके समस्या समाधान कैना, देश बनैना एमाले रोज्नके बिकल्प नइहो ।’
नेकपा एमालेके अध्यक्ष केपी सर्मा ओली अध्यक्ष रहेबेर कटरा काम हुइल छर्लगं बा उहाँ कहलै ‘हमार अध्यक्षहे अदालतके सेटिङसे हटाइलपाछे देशके स्थिति का बा सक्कुहुनहे पत्ता बा, एक ठो जनपक्षिय काम यी सरकारसे करे नइसेकल हो, रहटी रहटी भुमिहिन, सकुम्बासी, दलितहे जग्गाधनी पुर्जा डेना एमालेसे बनाइल भुमी आयोग समेत गठबन्धन सरकारसे खारेज करडेहल, उ आयोग खारेज नइहुइटे अभिनसम सक्कु भुमिहिन जग्गाधनी पुर्जा पासेक्टै ।’

नाकाबन्दीके बेला यी नाकाबन्दी हो कहिके समेत कहे नइसेक्ना काग्रेंस माओवादीके नेताहुकनके आघे हमार अध्यक्ष प्रधानमन्त्री रहेबेर अडिक हुके अडान लेलै ओ भारतसे नाकाबन्दी खोलल राना कहलै ‘ओटरा केल नाही भारतसे अतिक्रमण करल नेपालके भुमी लिपुलेक, लिम्पियाधुरा समेटल नक्सा प्रकाशित करके इतिहासमे नाम लिखैना सफल हमारे अध्यक्ष केपी सर्मा ओली हुइट, देशभर ४ हजार किलोमिटर सडक कालोपत्रे, टमान विमानस्थल निर्माण, हरेक पालिकामे अस्पताल, रेलमार्गके डिपिआर, शुरुङ मार्ग लगायतके टमान काम एमालेसे डेखैटी रहेबेर गठबन्धनसे एक ठो मजा काम डेखा डेहे मै च्यालेन्ज करटु ।’
सघन सहरी कार्यक्रम लागु करके तराइके सडक चौडा ओ पिच कैना कामके शुरुवात कैना केपी सर्मा ओलीके कारण मोर क्षेत्रमे सघन सहरीके डगर कालोपत्रे हुइटी बा्, हुलाकी सडक निर्माणके चरणमे बा, सिटि हल, विद्यालयमे स्मार्ट ल्याव, सामुदायिक भवन, संग्राहलय लगायतके और काम मोरे क्षेत्रमे मै निर्वाचित हुइल पाछेक हुइल बा, अपनेहुक्रे प्रत्यक्ष हेरे सेक्बी उहाँ कहलै ।’ मै निर्वाचित हुइना आघे शेरबहादूर देउवाफे यी क्षेत्रसे निर्वाचित हुइल हुइट उहाँ कहलै, अनी अब्बे स्वतन्त्र बनल पुस्करनाथ ओझाफे जिटल रहिट खै टे उहाँके कार्यकालमे काम हुइल मोर कार्यकालमे हुइलेसे नी जनताहे डेखैना करके काम, ओ अपने काम नइकैना और जे करलफे हेरे नइसेक्ना यी परिपाटी संघरीया त्यागे परल ।’
देश विकास कैना एक ठो पार्टी एमाले हो कहिके जनतासे पटा पासेकल बटै राना कहलै ‘आब नेपाली कहिके गर्भ कैना लायक बनैना ओ देशहे सम्बृद्ध बनैना एमाले हो उ कारण अगहन ४ पाछे एमाले नेतृत्वमे सरकार बने परल ओकर लाग जनता एक ढिक्का हुके एमाले रोजे परल ।’
पहुरा डटकमसे