कैलाली । कैलालीको लम्की तनावग्रस्त बनेको छ । ट्रकको ठक्करबाट १ महिलाको मृत्यु भएपछि लम्की तनावग्रस्त बनेको हो । जिल्ला प्रहरी कार्यालय कैलालीका प्रवक्ता तथा प्रहरी नायब उपरीक्षक (डीएसपी) प्रतीक बिष्टका अनुसार ट्रकको ठक्करबाट टीकापुर नगरपालिका–२ की ४० वर्षीया गोमा थापाको मृत्यु भएको छ ।
पूर्वपश्चिम राजमार्गअन्तर्गत लम्की बजारमा ना२ख ९३७० नम्बरको ट्रकले ठक्कर दिएको थियो । उनको घटनास्थलमै मृत्यु भएपछि राजमार्ग अवरुद्ध गरिएको छ ।
स्थानीयले राजमार्गमा प्रदर्शन गर्न थालेका छन् भने भीड नियन्त्रण गर्न प्रहरीले आधा दर्जन बढी सेल अश्रुग्यास प्रहार गरेको छ । लम्की बजार पनि बन्द गरिएको छ ।
यसैबीच, आक्रोशित भीडले ठक्कर दिने ट्रकमा आगजनी गरेका छन् । घटनापछि राजमार्ग अवरुद्ध गरिएको छ ।