धनगढी । अइना अगहन ४ गते हुइना प्रदेश तथा प्रतिनिधिसभा निर्वाचनमे बर्दिया क्षेत्र नम्बर २ के चुनावी माहोल ताटल बा । उ निर्वाचन क्षेत्रसे नागरिक उन्मुक्ति पार्टीके संस्थापक रेशमलाल चौधरी फेन उम्मेदवारी डेहल रहिट । मने, टीकापुर घटनासम्बन्धी मुद्दाके कारण हाल जेलमे रहल ओहकान उम्मेदवारी निर्वाचन आयोगसे खारेज करडेहल ।
ओहकान उम्मेदवारी खारेज हुइलपाछे उहे क्षेत्रमे रेशमके बाबा लालवीर चौधरीके स्वतन्त्र उम्मेदवारी रहल बा । ओहकान पक्षमे कैसिन नतिजा आइ कना चासोके रुपमे हेरल बा । स्वतन्त्र उम्मेदवारी हुइलेसे फेन रेशमके विकल्पमे नागरिक उन्मुक्ति पार्टीसे उहाँहे आघे सारल बटाइल बा ।
इहे बिच उहाँ आपन उम्मेदवारी राजनीतिक अधिकार प्राप्तीके लाग बटैले बाटै । राज्यसे जब फेन थारु सहित उत्पीडित समुदायहे राजनीतिक अधिकार डेनासे वञ्चित कैल बटैटी उहाँ ओइसीन बटाइल हुइट ।
उहाँ कहलै–‘राज्यसे जब फेन थारुसहित उत्पीडित वर्गहे राजनीतिक अधिकार डेनासे बञ्चित करले बा । अधिकार मागेबर दमन करले बा । २०७२ के बात करेबर संविधान लेखनके क्रममे राज्यसे हुइल दमन जग जाहेर बा । दुनियाँ डेख्ले बा । रेशमसहित राजबन्दी निर्दोष रलेसे फेन अनाहकमे जेलमे कोच्ना काम करले बा । अधिकार मागेबर इ हदसमके महाअन्याय हम्रे कबसम सहना हो ? जौन कारण मोर उम्मेदवारी राजनीतिक अधिकार प्राप्तिके लाग हो । न्यायके लाग हो ।’
यकर साथे उहाँ राजबन्दी रिहाइ, थरुहट आन्दोलन, भाषा संस्कृति संरक्षण ओ लडिया नियन्त्रण, नमूना विकास लगायतके लाग समेत आपन उम्मेदवारी रहल बटैलै ।
‘पहिल नम्बरमे राजबन्दी रिहाइके लाग हो । डुसरा नम्बर राज्यसे दमन करल थरुहट आन्दोलनहे उठाइक लाग ओ टिसरा नम्बरमे यहाँके वैभवशाली संस्कृति संरक्षणके लाग हो । यहाँके लडिया कटान नियन्त्रण, बाढ प्रभावित जनताकाके उत्थानके लाग हो । यहाँके नमूना सर्वाङ्गीण विकासके लाग हो । बरवार राजनीतिक दलसे कैसिक पृथक ओ मौलिक मोडलमे विकास करे सेकजाइ कहिके मोर उम्मेदवारी हो’, उहाँ कहलै ।
यकर साथे उहाँ बर्दियाके आमजनताके साथ ओ सहयोग एकदमै उत्साहपूर्ण रहल बटैले बाटै । ‘मै बर्दियाके लाग लावा अनुहार फेन नैहुइटु, ओहेमारे मोर उम्मेदवारीसे नै आमजनताके साथ सहयोगमे कौनो कमी नैहो । उहाँहुक्रनके उत्साहसे महिन लावा ऊर्जा मिलल् बा’,–उहाँ कहलै ।
उहाँ आघे कहलै–‘मोर जरम दाङमे हुइल हो । मने मोर पढाइलेखाइसे पुरे जवानी बर्दियामे बिटल । बर्दियाके गुलरियामे मोर आभिन फेन घरजग्गा बा । बर्दियामे हमार गोत्यार किल ३ सय घरधुरी बाटै । जौन कारण मै यहाँके लाग नौलो अनुहार नैहुइटुँ । यहाँके परिवेश, विकासके अवस्थासँग मजासे बुझ्ले बाटुँ । बर्दियाके ग्रामीण क्षेत्रके विकास ओ सेवामे आपन जीवन समर्पित करले बाटु । कैलालीसे फेन बर्दियामे मोर जीवनके ढिउर समय बिटल बा । मोर सामाजिक तथा कार्यक्षेत्र बर्दिया हो । सामान्य गाउँके लेखनदाससे ३५ मौजा (गाउँ)के लेखनदास इहे क्षेत्रमे हुइल रहुँ ।’
यद्यपि क्षेत्र नम्बर २ से लालवीरहे चुनावी नतिजा आपन पक्षमे पर्ना भर सहज भर नैडेखजाइठ् । बर्दिया २ मे सत्ता गठबन्धन रहल बा कलेसे एमालेके उपस्थिति फेन बलगर बा । गठबन्धनसे नेकपा माओवादी केन्द्रसे सुरेश पन्थहे उम्मेदवार बनैले बा कलेसे एमालेसे पंकज सिंह राठौरहे मैदानमे उटरले बा ।
उ क्षेत्रसे राष्ट्रिय प्रजातन्त्र पार्टीके विनय रावल, नेपाल मजदुर किसान पार्टीके धर्मराज जैसी आचार्य, लोकतान्त्रिक समाजवादी पार्टी नेपालके अनिरुध्या आर्य, राष्ट्रिय स्वतन्त्र पार्टीके ओम प्रकाश बसौला फेन उम्मेदवार बाटै । ओस्टके लालवीरबाहेक राम प्रसाद आचार्य फेन स्वतन्त्र उम्मेदवार रहल बाटै ।
आघेक निर्वाचनमे उ क्षेत्रसे नेकपा माओवादी केन्द्रके सन्तबहादुर थारु ५ हजार ५५५ मतके साथ विजयी हुइल रहिट । उहाँ नेपाली कांग्रेसके गोपाल दहितहे पराजित करल रहिट । हाले स्थापित नागरिक उन्मुक्ति पार्टीके स्थानीय तहके मत हेरेबर बर्दिया जिल्लामे बलगर नैडेखजाइठ् । उ पार्टीसे मेयर–अध्यक्षमे तीन स्थानीय तहमे किल उम्मेदवारी डेहल रहे । जेम्ने गुलरिया नगरपालिकामे ५११, गेरुवा गाउँपालिकामे १६६ ओ राजापुर नगरपालिका १३४८ मत प्राप्त करले रहे ।
इ बाहेक ठाकुरबाबा नगरपालिका, बढैयाताल गाउँपालिका, बारबर्दिया नगरपालिका, बासगढी नगरपालिका ओ मधुवन नगरपालिका उ पार्टीसे प्रमुख पदमे उम्मेदवारी नैडेहल रहे । नतिजाअनुसार कांग्रेस ५ स्थानीय तह तथा एमाले ओ माओवादीसे क्रमशः २ ओ १ स्थानीय तह जिटल रहे ।
के हुइट लालवीर ?
६६ वर्षिय लालवी चौधरी कैलालीके जानकी गाउँपालिका–६ (साविक दुगौली गाविस ९) जगतपुरके बासिन्दा हुइट । अब्बे उहाँ बर्दिया क्षेत्र नं. २ के प्रतिनिधी सभा सदस्यके उम्मेदवार रलेसे फेन कैलाली, बर्दिया लगायतके जिल्लामे लालवीर चौधरी लावा अनुहार भर नैहुइट । ओहकान अपने परिचय बा छवि बा– सामाजिक अगुवाके रुपमे । मने पाछेक राजनीतिक अवस्थासे ओहकान परिचय फेरल बा । पूर्व सांसद रेशमलाल चौधरीके बाबाके रुपमे उहाँहे ढिउरजाने चिन्हे लागल बाटै । जीवनभर समाजमे लगाइल ओहकान गुनहे इ परिचयसे छाहीमे रख्ले बा ।
गाउँघरके समान्य लेखनदासके भूमिकासे सुरु करल सामाजिक जीवनसे उहाँहे पाछे बदियाके ३५ मौजा ९गाउँ०के लेखनदास बनाइल । २०३६ से २०४६ सम रानीजमरा कुलो समितिके समिति सचिव हुइटी २०४७ से २०७९ सम अध्यक्षके जिम्मेवारी सम्हारल रहिट । उहाँ थारु कल्याणकारिणी सभा (थाकस)के २०३९ से २०४८ क्षेत्रीय सभापति हुइटी केन्द्रीय सदस्य हुइल रहिट । अत्रे किल नैहोके, उहाँ २०५४ से २०६० सम कैलाली जिल्ला सिंचाइ महासंघके अध्यक्ष हुइटी २०६० से २०६८ सम सिंचाइ महासंघके केन्द्रीय सदस्य हुइल रहिट ।