धनगढी, १९ भदौ । सुदूरपश्चिम प्रदेशके मुख्यमन्त्री कमलबहादुर शाह बालबालिकाके हक अधिकारके लाग यहाँ स्थित सरोकारवाला निकायहे सहकार्य कैना आह्वान करले बाटै ।

मंगरके रोज धनगढीमे हुइल स्थानीय स्तरमे बालबालिकाके अवस्था विश्लेषण तथा बार्षिक प्रगति समीक्षा कार्यक्रमहे सम्बोधन कैटी मुख्यमन्त्री शाह ओइसीन आह्वान करल हुइट । उहाँ बालबालिकाहुक्रनके शिक्षा, स्वास्थ्य, नेतृत्व विकास, पोषणके विषय लगायत बालश्रम अन्त्य, यौन दुव्र्यवहार, बालविवाह, लागु औषध दुव्र्यसनी रोकथामके लाग यहाँ स्थित सरकारी तथा गैरसरकारी निकायहे संयुक्त रुपमे काम कैना आह्वान करल हुइट ।

प्रदेशमे बालबालिकाहुक्रनके ढेर समस्या रहल औंल्याइटी अकली उ समस्या समाधान करे नैसेक्ना बटैटी उहाँ सक्कु निकायके साथ सहयोग आवश्यक रहल फेन बटाइल रहिट ।

‘प्रदेशमे बालबालिकाहुक्रनके लाग शिक्षा, स्वास्थ्य, पोषण लगायतके ढेर समस्या रहल बा’, मुख्यमन्त्री शाह कहलै–‘अब्बे टे आउर ढेर जैसिन बालबालिकाहुक्रे लागुऔषध सेवन, दुव्र्यसनी ओर फस्टी गैल बाटै । इहीहे नियन्त्रण तथा बालबालिकाहुक्रनके शिक्षा स्वास्थ्यके लाग सक्कु जाने एकजुट होके आघे बह्रे पर्ना आवश्यक रहल बा ।’

कार्यक्रमके बर्का पहुना समेत रहल मुख्यमन्त्री शाह बालबालिकाहुक्रनके हकअधिकार सम्बोधनके लाग प्रदेश सरकार नीति तथा कार्यक्रम फेन लानल बटाइल रहिट ।

कार्यक्रमममे सामाजिक विकास मन्त्री झपट बहादुर साउद प्रदेशमे बालबालिकाके अवस्था दयनीय रहल बटाइल रहिट । उहाँ अब्बे फेन पहाडी जिल्लामे बालबालिकाहुक्रे शिक्षा, स्वास्थ लगायत पोषणयुक्त खैनाचीजसे वञ्चित रहल बटाइल रहिट । ओस्टके अब्बे ढेर जैसिन बालबालिका लागुऔषध दुव्र्यसनी ओर लागल ओरसे सक्कु जनहनहे चुनौती फेन थपल बटाइल रहिट ।

मन्त्री साउद सक्कु बालबालिका शिक्षा स्वास्थ्यसे बञ्चित हुइ नपरे कहटी प्रदेश सरकारके विशेष ध्यान डेना प्रतिवद्धता जनाइल रहिट । साथे उहाँ बालबालिकाहुक्रनमे बह्रटी रहल लागु औषध दुव्र्यसनी न्यूनीकरणके लाग सक्कु जाने लागे पर्ना औंल्याइल रहिट ।

कार्यक्रममे वल्र्ड भिजन नेपालके फिल्ड अपरेसन डाइरेक्टर अनुप राणा बालबालिकाहुक्रनके सवालहे प्राथमिकताके साथ सम्बोधन करे पर्ना बटाइल रहिट । उहाँ दुई दशक ढेर समयसे बालबालिकाहुक्रनके लाग समावेशी स्वास्थ्य शिक्षा, पोषणके लाग काम कैटी आइल बटैटी आगामी दिनमे फेन प्रदेश सरकार तथा स्थानीय सरकारसे सहकार्य कैके आघे बह्रना प्रतिवद्धता जनाइल रहिट ।

आस्था नेपालके अध्यक्ष दुर्गा भण्डारीके सभापतित्वमे हुइल कार्यक्रममे प्रगतीशिल युवा समाज बझाङके रमेश कुमाार केसी स्वागत मनतब्य राखल रहिट ।

वल्र्ड भिजन नेपालके सहयोग, आस्था नेपाल, यार्ड लगायत संघसंस्थाके आयोजना तथा नेपाल पत्रकार महासंघ सुदूरपश्चिमके सहजीकरणमे कार्यक्रम हुइल हो ।

कार्यक्रममे भजनी नगरपालिकाके नगरप्रमुख केवल चौधरी, घोडाघोडी नगरपालिकाके उपप्रमुख गुलिया चौधरी, गौरीगंगा नगरपालिकाके उपप्रमुख भोजबहादुर बम, कैलारी गाउँपालिकाके उपाध्यक्ष भगवती चौधरी, आर्दश गाउँपालिका डोटीके उपाध्य लक्ष्मी रोकाया, लगायत बालबालिकाके क्षेत्रमे काम करुइया टमान सरकारी तथा गैरसरकारी संघसंस्थाके प्रतिनीधीहुक्रनके उपस्थिति रहल रहे ।