धनगढी, १६ सावन । खेटुवामे लगाइल धान बोटैना सुरु हुइलपाछे थारु बस्तीमे आजकाल हरेरी पुजा हुइटी रहल बा ।
धानबालीमे किराकाटी, रोगव्याढी नालागे तथा लगाइल धान मजा होए कना उदेश्यके साथ करजिना हरेरी पुजा सुरु हुइल हो । हाल प्रत्येक बस्तीमे परम्परागत ढंगसे थारु गुरुवा ओ केसौकामार्फत पुजा हुइटी रहल बा ।
यहेक्रममे शुकके रोज कैलालीके कैलारी गाउँपालिका–७, भुँइयाँफाँटा गाउँके स्थानीयहुक्रे हरेरी पुजा मनैले बटै । शुकके रोजसे पुजा सुरु करल स्थानीयहुक्रे रातभर नैसुट्के टमान साँस्कृतिक कार्यक्रमके साथ पुजा करल गाउँके भलमन्सा फिरु चौधरी जानकारी डेलै ।
दुई दिनसम चल्न पुजाके क्रममे पहिल दिन पुजा कर्ना ओ रातभर टमान सांस्कृतिक कार्यक्रम कर्ना प्रचलन थारु समुदायमे रहटी आइल बा । कलेसे डोसर दिन फेन विहन्नी पुजा पाठ कर्ना जनाइल बा । टमान मेरके जडीबुटीहे एक्केमे पिसके खिरभन (औषधी) बनाके सक्कु घरढुरीहे डेजाइठ् । असिके डेहल घिरभन गाउँलेहुक्रे आ–आपन खेटुवाक् धानेम छिट्ना संगे उइराक् गहरामे डर्ना प्रचलन रहल थारु बुद्धिजीवीहुक्रे बटैठै । ओस्टके कौनो–कौनो थारु बस्तीमे खिरभनके सट्टा कन्डक् आगी धानक् खेटुवामे जाके ढुपैना फेन प्रचलन रहल जनागिल बा ।