धनगढी । थारु लेखक संघ नेपाल कैलालीके आयोजनामे हुईल २ डिनिक साहित्य लेखन तथा प्रशिक्षण कार्यक्रम निम्जल बा ।
श्री सर्वोदय माध्यमिक विद्यालय धनगढी–१४ कैलालीके सभाहलमे हुइल कार्यक्रममे स्थानिय विद्यालयके लगभग ४५ प्रशिक्षार्थी सहभागी हुइल रहिट । उ प्रशिक्षण कार्यक्रममे साहित्यकार तथा शिक्षक कृष्णसिंह पेला ओ रघुनाथ ओझा प्रशिक्षण करल रहिट ।
साहित्य साधनामे अब्बके युवा रुची नई डेखाईल ओ डेखैले से फेन कैसिक लिख्ना कहिके ज्ञान नई रहलक ओर्से साहित्य लेखनमे घैखर बनाईक लाग कार्यक्रमके आयोजना करल संघके सचिव अनिल कुश्मी बटैलै ।

प्रशिक्षण कार्यक्रममे सहभागी रेजिना चौधरी साहित्य लिख्ना ज्ञान सीप संगे प्रेरणा मिलल् बटैली । थारु लेखक संघ नेपाल कैलालीके अध्यक्ष जीतबहादुर चौधरी, साहित्य लेखन तथा प्रशिक्षण कार्यक्रम मजासे निम्जल जानकारी करैटी सहयोग करुईया सक्कु जन्हन धन्यवाद डेले बटै ।