३२ असार २०८१, सोमबार July 15, 2024

कैलारी पूर्ण खोप पालिका घोषणा

२६ असार २०८०, मंगलवार
कैलारी पूर्ण खोप पालिका घोषणा

हसुलिया, २६ असार । कैलाली जिल्लाके कैलारी गाउँपालिका पूर्ण खोप पालिका सुनिश्चितता तथा दिगोपना घोषणा हुइल बा ।
कैलारी गाउँपालिका खोप समन्वय समितिके सचिवालय हसुलिया कैलालीके आयोजनामे मंगरके रोज एक कार्यक्रमके विच पूर्ण खोप पालिका सुनिश्चितता तथा दिगोपना घोषणा हुइल हो ।
जिल्ला समन्वय समिति कैलालीके कार्यवाहक सभापति खगराज भुषाल खोप लगैना उमेरके लर्कनहे खोेजके खोप लगुइया स्वास्थ्यकर्मी तथा महिला स्वास्थ्य स्वयं सेविकाहुकनहे भारी योगदानसे कैलारी पूर्ण खोप पालिका घोषणा बटैलै । खोपसंगे कोरोना महामारीके बेलाफे स्वास्थ्यकर्मी भारी योगदान नइडेहल रहलेसे ढेर जाने ज्यान गुमाई पर्ना अवस्था अइना उहाँ बटैलै ।


कैलारी गाउँपालिकाके अध्यक्ष राजसमझ चौधरी पालिकाहे खोप सुनिश्चित कराईक लाग खटल महिला स्वास्थ्य स्वयं सेविका, स्वास्थ्यकर्मीनहे धन्यावाद डेहल रहिट । पूर्ण खोप पालिका सुनिश्चितता तथा दिगोपना घोषणा कार्यक्रममे बोल्टी यी पालिकामे स्वास्थ्य सम्बन्धी ढेर समस्या रहलफे बटैलै । उहाँ कहलै, उन्मुलन हुइल कुष्ठरोग चालु आर्थिक बर्ष आठ जनहनहे डेखा परलपाछे थप चुनौती बह्रल बा ।


कैलारीमे थारु समुदायके गझिन बस्ती रहल ओरसे यहाँ सिकलसेलके विमारी ढेर डेखल बटै । पालिकामे डेखा परल स्वास्थ्य समस्याके सामाना करलेक टमान संघ संस्थासे मिल्के स्वास्थ्य शिविरफे संचालन करल अध्यक्ष बटैलै ।
गाउँपालिका उपाध्यक्ष भगवतीकुमारी चौधरी खोपसे टमान मेरिक रोगसे बचैना कारण खोेप सक्कु बालबालिकासे लगार्ई पर्ना बटैैली । गाउँपालिकासे खोपसंगे पोषण कार्यक्रमहहे जोड डेहल उहाँ बटैली । भौतिक विकास संग्गे सामाजिक विकास आवश्यक रहल कहटी देशके विकास करेक लाग स्वास्थ्य रहना जरुरी रहलफे उपाध्यक्ष बटैैली ।


स्वास्थ्य कार्यालय कैलालीके प्रमुख लालबहादुर धामी कैलाली १३ पालिका मन्से मंगरके रोज संग्गे कैेलारी गाउँपालिका, जोशीपुर गाउँपालिका ओ गोदावरी नगरपालिका पूर्ण खोप पालिका सुनिश्चितता तथा दिगोपना घोषणा हुइल बटैलै । कैलारीमे स्वास्थ्य इन्डिककेटर मजा रहल उहाँ बटैलै । स्वास्थ्य क्षेत्रमे कार्यरत स्वास्थ्यकर्मी तलब माग करटी आन्दोलन करटी रहल बेला फेरसे काजमे रहल स्वास्थ्यकर्मीनहे अपने ठाउँमे पठैना सूचना जारीसे सावनसे स्वास्थ्य क्षेत्रमे प्रभाव परे सेक्ना उहाँ बटैलै ।

बर्खा संग्गे डेगु रोगके प्रकोप बह्रल कारण डेगु नियन्त्रणके लागफे सरसफाईमे ध्यान डेना उहाँ आग्रह करलै । उहाँ कहलै, कोरोनासे खतरनाक डेगुं हो । यी रोग लग्लेसे मृगौलाफे खराब करठ । लापारवाही नइकके यिहीहे बाँचेक सचेतता अपनैना आवश्यक बा ।
कैलारी गाउँपालिकाके स्वास्थ्य शाखा प्रमुख नरेशकुमार चौधरी कैलारी गाउँपालिका २०७४ सालसे पूर्ण खोप पालिका सुनिश्चितता तथा दिगोपना घोषणा करटी आइल बटैलै । उहाँ कहलै, यी पालिकामे जलम लेहलसे १५ महिनासमके ७ सय ७६ बालबालिका ओ १६ महिनासे १५ बरस टरेक २ हजार ४ सय ६ बालिकाहे खोप लगाइल बटैलै । पालिका भिटर ८ जाने बालबालिका खोपसे नइलगैले रहिट ओइनफे खोजके खोप लगाइल स्वास्थ्य शाखा प्रमुख नरेशकुमार चौधरी बटैलै ।
महिला स्वास्थ्य स्वयं सेविका विन्द्रा चौधरी अपनेहुक्रे पूर्ण खोेप सुनिश्चितताके लाग लर्कनहे खोज खोज खोप लगाइल बटैली । उहाँ कहली, महिला स्वास्थ्य स्वयं रात विरात काम करे पर्ना ओरसे सुविधा न्यून रहल बटैटी स्वास्थ्य स्वयंं सेविका नीति बनैना आग्रह करली ।
कार्यक्रममे नेपाली काँग्रेस कैलारी गाउँपालिका सभापति कृष्ण प्रसाद चौधरी पहिले पहिले बाल मृत्युदर, मातृ मृत्युदर ढेर रहल मने खोप आइलपाछे न्यून हुइल बटैलै । नागरिक उन्मुक्ती पार्टी कैलारी गाउँपालिकाके उम्मेदवार भीष्म चौधरी स्वास्थ्य क्षेत्रमे भौतिक पूर्वाधार लगायत दक्ष स्वास्थ्य जनशक्तिके कमी रहल बटैलै । अपन पार्टीसे स्वास्थ्य क्षेत्रके लाग विशेष पहल कैेना प्रतिबद्धता जनैलै । कार्यक्रममे स्वागत मन्तव्य व्यक्त करटी कार्यपालिका सदस्य टीका चौधरीभुल खोप सुनिश्चित पालिका घोषणा कैना स्वास्थ्यकर्मीके भुमिका अहम रहल कहटी कैलारीमे कुष्ठरोग फेरसे डेखा परलपाछे ठप चुनौती ठपल बटैली ।
यिहे विच १ से वडा ९ वडा कार्यालयके साथे स्वास्थ्यकर्मीनहेफे सम्मान कैगिल बा । सम्मान हुइल स्वास्थ्यकर्मीमे मनाउ स्वास्थ्य आधारभूत स्वास्थ्य केन्द्रके महेन्द्रराज कठरिया, रामदुलारी चौधरी, बसौटी स्वास्थ्य केन्द्रके बलिचरण चौधरी, उर्मिला जोशी, हसुलिया स्वास्थ्य चौकीके मेनुका चौधरी, भोजकुमारी चौधरी, के गाउँ आधारभूत स्वास्थ्य केन्द्रके भोजराज नेगी, लक्ष्मीदेवी रोकाय, पवेरा स्वास्थ्य चौकीके नत्थु चौधरी, रिता चौधरी, बनकटटा आधारभूत स्वास्थ्य केन्द्रके फलिराम चौधरी, रेखाकुमारी चौधरी, रतनपुर स्वास्थ्य चौकीके संजिव गुरुङ, रितु खरेल रहल बटै । ओस्टेक करके उदासीपुर प्राथमिक स्वास्थ्य केन्द्र्रके संजयकुमार महतों, सुनिता चौधरी, गदरिया स्वास्थ्य चौकीके विरबहादुर चौधरी, सरिता चौधरी रहल बटै । कार्यक्रममे वडा अध्यक्ष, कार्यपालिका सदस्य, प्रमुख प्रशासकीय अधिकृत विरबहादुर ऐर, सामाजिक विकास शाखा प्रमुख यगम कलेल, टमान शाखाके प्रमुख, स्वास्थ्यकर्मी, महिला स्वास्थ्य स्वयं सेविका, टमान संघ संस्थाके प्रतिनिधिहुकनके सहभागिता रहल रहे ।