धनगढी । सामुदायिक वनमे सुशासनके लाग धनगढीमे कार्यशालाके आयोजना कैगैल बा ।
सामुदायिक वन उपभोक्ता महासँग धनगढीमे सुशासनके लाग कार्यशाला करल हो । सनिच्चरके धनगढीमे आयोजना करल कार्यशालामे सामुदायिक वन उपभोक्ता महासंघके अध्यक्ष ठाकुर भण्डारीके सहभागिता हुइल रहे । भण्डारी, सामुदायिक वन सुशासन ओ विकास निर्माणके क्षेत्रमे काम करेपर्ना बटैलैं । उहाँ कलैं, ‘सामुदायिक वनमे महिला सहभागिता बर्हल बा । २०६५ सालमे ५० प्रतिशत महिला अनिवार्य लिखले रहि । घरके मुली फेन महिला हुइँट । पुरुष विदेशओर लगठैं, घरके सब जानकारी महिलनहे रहठ । हमरे कर्मचारीहे फेन पर्हैले रहि । महिला सुशासनके पक्षमे फेन अब्बल बटैं ।’

उहाँ सामुदायिक वन आम्दानीके २५ प्रतिशत वनके संरक्षण तथा सुरक्षामे खर्च कर्ना सामुदायिक वनके पदाधिकारीनहे निर्देशन डेलि । बाँकी रकम विकास निर्माण ओ दलित तथा पाछे परल समुदायके उत्थानमे खर्च कैना भण्डारी सामुदायिक वनहे आग्रह करलैं ।
कैलालीमे तीन सय ७३ ठो सामुदायिक वन रहलमे सब जे सुशासनमे ध्यान डेहे पर्ना उहाँके जोड रहे । उहाँ उपभोक्ताके कारणसे किल नेपालके वन क्षेत्र जोगल समेत दाबी कैलैं । सामुदायिक वन उपभोक्ता महासंघ सुदूरपश्चिमके अध्यक्ष झुमा चौधरी महिला हुँकरे सञ्चालन करल सामुदायिक वनमे सुशासन रहल दाबी कैलैं ।
उहाँ सरकारसे संरक्षण करे नैसेकल वन समुदाय ओइने संरक्षण करल बटैलैं । राज्य नैपुगल ठाउँमे फेन सामुदायिक वन पुगल दाबी उहाँके बा । उहाँ सामुदायिक वन महिलाके सहभागिता ५१ प्रतिशत रहल बटैलैं । कैलालीके सामुदायिक वनके पदाधिकारी ओइने सुशासन प्रवद्र्धनके लाग तालिम डेहल हो ।
सामुदायिक वन वार्षिक रुपमे करेपर्ना कामके बारेमे तालिममे जानकारी डेगैल रहे । सामुदायिक उपभोक्ता महासंघ आयोजना करल कार्यक्रम प्रदेश महासंघ व्यवस्थापन कैले रहे ।