धनगढी । धनगढी उपमहानगरपालिका वडा नम्बर ५ तारानगरके मंगल चौधरीके परिवार घरवार विहिन हुइ पुगल बा ।
कुमारी बैंक ओ बिचौलिया झापाके सन्तोष आचार्य ओ ओहकान गोसिनीया सुशीला खतिवडा ओ तेजराम चौधरीके जालझेलमे परके उ परिवार घरबार विहिन हुइ पुगल पीडित परिवारके गुनासो रहल बा । गहनु डगौराके नाउँमे रहल १३ कट्ठा १० धुर जग्गा ओ दुईठो पक्की घर बैंकसे लिलामी सकारके औरे जनहनहे बिक्री करेबर उ परिवार अब्बे बिचल्लीमे परल हो ।
उहे घटनाहे लेके थारु कल्याण कारिणी सभा कैलाली, थारु नागरिक समाज कैलाली, थरुहट थारुवान मुक्ति मोर्चा कैलाली ओ थारु विद्यार्थी समाज कैलाली बुधके एक संयुक्त प्रेस विज्ञप्ती जारी कैटी ध्यानाकार्षण जनैटी दोषीहे कडा कारवाहीके माग कैले बा ।

प्रेस विज्ञप्तीमे लिखल बा–‘मंगल चौधरीके घर परिवार उठीबास हुइना मेरके कुमारी बैंकसे धितो लिलाम कैके सुनियोजित ढंगसे विक्री समेत करसेकल गैर जिम्मेवारीपुर्ण कार्य प्रति हमार गम्भीर ध्यानाकर्षण हुइल बा । कुमारी बैंक, सुशिला एण्ड श्रृजना ट्रेडर्स प्रालिके शेयर धनी सन्तोष आचार्य, सुशिला खतिवडा ओ तेजराम चौधरीके मिलोमतोमे सोझासाझा व्यक्तिहे घरवास विहिन बनैना किमार्थ फेन मजा कार्य नैहो । निज सेयर धनी ओ कुमारी बैंक जग्गा सकार कैके करल खुलायाम बदमासीके कारण सोझासाझा व्यक्ति घरवार विहिन हुइना कहलक पीडितके पक्षमे सरकार विहिनताके आभास हुइल बा ।’
विज्ञप्तीमे आघे लिखल बा–‘सुशिला एण्ड श्रृजना टेडर्स प्रालि से कर सेवा कार्यालयसे २०७२ असोज २८ गते प्राप्त करल कर चुक्तामे कम्पनीसे जम्मा १३ लाख १० हजार ७५० रुपियाके कारोवार रहलमे २०७२ कात्तिक १९ मे भक्तपुरके लोकन्थली स्थित एपेक्स डेभलप्मेन्ट बैंक हाल(कुमारी बैंक) से ३ करोड रुपैयाके भारी परिमाणके ऋण व्यवस्थापन कैना स्वाभाविक रुपमे बैंकके कमजोरी हो कना हमार ठहर रहल बा । तसर्थ, कुमारी बैंक, बिचौलिया ओ जग्गा सकार करुइया शैलेश कुमार सिंहके सुनियोजित रुपमे मिलोमतो कैके फसाइल पीडित मगल कुमार चौधरीहे न्याय ओ दोषीहे कडा कारवाहीके लाग इहे प्रेस विज्ञप्ती मार्फत आग्रह करटी ।’