धनगढी, १४ बैशाख । सुदूरपश्चिम पदेशमे ९५३ मुक्त कमैया परिवार पुनस्र्थाना हुइना बाँकी रहल बाटै ।
मुक्त कमैया समाज केन्द्रीय समितिके तथ्यांक अनुसार उ संख्यामे मुक्त कमैया पुनस्र्थाना हुइना बाँकी रहल डेखाइल हो । नेपाल सरकारसे २०५७ साउन २ गते कमैया मुक्तिके घोषणा तथा २०७० असार १३ गते कमलरी मुक्तिके घोषणा करल रहे ।
कमैया मुक्तिके दुइ दशकसे ढेर समय हुइलेसे फेन आभिन फेन कमैयाहुक्रनके पुनस्र्थापना हुइ नैसेकल केन्द्रीय अध्यक्ष चौधरी दुखेसो पोख्लै । कौनो फेन सरकार तदारुकताके साथ काम नैकरल ओरसे मुक्त कमैयाहुक्रनके पुनस्र्थापना हुइना बाँकी रहल अध्यक्ष चौधरी बटैलै ।
यहोर कमैया मुक्ति हुइलपाछे २७ हजार २१ मुक्त कमैया परिवारहे पुनस्र्थापित करल बा जेम्ने सुदूरपश्चिम प्रदेशमे १२ हजार ९२४ मुक्त कमैया परिवार पुनस्र्थापना हुइल बाटै ।
ओस्टके कैलाली ओ कञ्चनपुर जिल्लाके ५२९ परिवार अनुचित जग्गा पाइल ओरसे ओइनके सट्टा भर्ना कैना बाँकी रहल जनाइल बा । ओस्टके कैलालीके १७३ कमैया परिवारके परिचय पत्र बदर होके पुनस्र्थापना प्याकेजसे वञ्चित रहल जनाइल बा कलेसे ३८० परिवार परिचय पत्र पाके फेन जग्गा प्राप्त करे नैसेकल जनाइल बा ।
ओस्टके भूमि व्यवस्था, सहकारी तथा गरिवी निवारण मन्त्रालयके तथ्यांक अनुसार सुदूरपश्चिम प्रदेशमे ३ हजार ५०८ कमलरीके तथ्यांक लेहल रहे उमध्ये १ हजार १५८ जाने किल परिचय पत्र पाइल डेखजाइठ् ।
भूमि व्यवस्था सहकारी तथा गरिबी निवारण मन्त्रालयके २०७५÷७६ के तथ्यांक अनुसार कैलाली ओ कञ्चनपुरके २ हजार ३५० कमलरी परिचय पत्र पैना बाँकी रहल डेखाइल बा ।

पुनस्र्थापनाके लाग अधिकार यात्रा
मुक्त कमैया, बुक्रही ओ कमलरीहुक्रनके न्यायिक पुर्नस्थानाके लाग आज बैशाख १४ गतेसे अधिकार यात्रा २०८० सुरु हुइना हुइल बा ।
मुक्त कमैया समाजसे बुधके रोज धनगढीमे पत्रकार सम्मेलन मार्फत सुदूरपश्चिम अधिकार यात्रा २०८० बारे जानकारी कराइल हो । समाजके केन्द्रीय अध्यक्ष पशुपति चौधरी मुक्त कमैया ओ कमलरीहुक्रनके न्यायिक पुर्नस्थापनके लाग बनल कमैया श्रमिक पुर्नस्थापना कार्यविधि २०७९ नेपाल सरकार मन्त्री परिषदसे पारित कैके उ अनुसारके कार्य आघे बह्रैना दवाव डेना उद्देश्यसे यात्राके आयोजना करल बटैलै ।
अधिकार यात्रा कैलालीके टीकापुरसे सुरु होके धनगढीसम पुग्ना जनाइल बा । ओस्टके कञ्चनपुरके भीमदत्त नगरपालिकासे सुरु हुइना यात्रा टमान स्थानीय तह ओ कमैया बस्तीमे कोण सभा सहित कार्यक्रम कैना जनाइल बा ।
मुक्त कमैया समाजके कैलाली अध्यक्ष भरतराम चौधरी अधिकार यात्रा बैशाख १४ गते कैलालीके टीकापुरसे सुरु हुइटी जानकी गाउँपालिका, लम्की चुहानगरपालिका ओ बर्दगोरिया गाउँपालिकामे कोणसभा सहितके कार्यक्रम हुइना जनैलै । ओस्टके बैशाख १५ गते बर्दगोरिया गाउँपालिका, घोडाघोडीके सुख्खड हुइटी भजनी नगरपालिकामे साइकल ¥याली सहित कोणसभाके कार्यक्रम रहल जनाइल बा । बैशाख १६ गते भजनी नगरपालिका, कैलारी गाउँपालिकाके विपतपुर शिविर हुइटी गौरीगंगा नगरपालिकामे कार्यक्रम हुइना जनाइल बा कलेसे बैशाख १७ गते गौरीगंगा नगरपालिकाके बढैपुर, चौमाला हुइटी धनगढीके धुरझन्ना, श्रीलंकामे कोणसभा सहितके कार्यक्रम हुइना जनाइल बा ।
उहोर मुक्त कमैया समाज कञ्चरपुरके जिल्ला अध्यक्ष रामप्रसाद रानाके अनुसार बैशाख १४ गते भीमदत्त नगरपालिकाके सालघारी बस्तीसे सुरुहुइना साइकल सहितके अधिकार यात्रा बेदकोट नगरपालिकाके ओझाखाली, बीचफाँटा, धर्मपुर नयाँमुक्ति हुइटी छेलामे कार्यक्रम कैना जनाइल बा ।
ओस्टके बैशाख १५ गते बेलडाडी, बेलौरी रामघाट, लालझाडी, खैरगढैया, चान्देव बेलौरी हुइटी शोभातालमे कार्यक्रम हुइना जनाइल बा कलेसे बैशाख १७ गते लालझाडी, जाइजाला, मरघटैया, बैशखा, झलारी, मुक्ति, नौखरी, कृष्णपुर हुइटी शुक्लाफाँटा झलारीमे कार्यक्रमके आयोजना हुइना जनाइल बा । कलेसे बैशाख १७ गते कृष्णपुर बाणी, बेलझुण्डी, दयामतपुर, किचाही, बसन्तपुर, गजरौला, गोदावरी हुइटी कृष्णपुरके किचाहीमे ओ गोदावरीके अत्तरियामे कोण सभा सहितके कार्यक्रम हुइना अध्यक्ष राना जानकारी डेलै ।
मुक्त कमैयाहुक्रनके पुनस्र्थापना सहित टमान माग फेन रहल समाजके केन्द्रीय अध्यक्ष चौधरी बटैलै । नेपाल सरकार भूमि व्यवस्था सहकारी तथा गरिबी निवारण मन्त्रालयसे गठन करल मुक्त कमैया कमलरी हलिया ओ हरवाचरवा वस्तु स्थिति अध्ययन समितिके प्रतिवेदनके आधारमे निर्माण करल कमैया श्रमिक पुनस्र्थापना कार्यविधि २०७९ हे नेपाल सरकार मन्त्रिपरिषदसे पास कैके उ कार्यविधि बमोजिम शीघ्रादिशीघ्र कार्य सुरु कैना ओ शिक्षा, स्वास्थ्य, रोजगारी, सामाजिक सुरक्षा सहितके दीगो जीविकोपार्जनके सुनिश्चितता लगायतके माग रहल केन्द्रीय अध्यक्ष चौधरी बटैलै ।