धनगढी, २० पुस । कैलालीमा रैथाने थारु आलु गर्ने महिला कृषक समूहलाई कृषि उपकरण सहयोग गरिएको छ । कैलारी गाउँपालिकाले ५० प्रतिशत अनुदानमा थारु आलु खेतीमा संलग्न कृषक समूहलाई कृषि उपकरण सहयोग दिएको हो ।

वडा नम्बर २ स्थित जागरण महिला कृषक समूहलाई दुई वटा पावर ट्रिलर र दुई वटा पानी तान्ने मोटर दिएको गाउँपालिकाको कार्यालयले जानकारी दिएको छ ।

कैलारी गाउँपालिकाका उपाध्यक्ष भगवतीकुमारी चौधरी र वडा अध्यक्ष विकास चौधरीले महिला समूहलाई कृषि उपकरण हस्तान्तरण गरेका छन् । सो अवसरमा उपाध्यक्ष चौधरीले थारु आलु उत्पादन बढाउन कृषकलाई आग्रह गरिन् । उत्पादित आलुको बजारीकरणमा गाउँपालिकाले सहयोग गर्ने पनि उनले प्रतिबद्धता जनाइन् ।
रैथाने थारु आलु अन्य जातका आलुभन्दा स्वादिष्ट मानिन्छ । यो आलु मिठो रहने गरेकाले बजारको समस्या नरहेको उपाध्यक्ष चौधरीको भनाइ छ । सो गाउँपालिकामा थारु आलु उत्पादन बढाउन थारु आलु पकेटक्षेत्र बनाएर खेती गरिएको छ ।