धनगढी । ७औं राष्ट्रिय थारु साहित्य सम्मेलन बाँकेमे हुइना हुइल बा ।
थारु लेखक संघ नेपाल बाँके ओ थारु गोचाली समाज नेपाल राप्तीसोनारीसे शनिच्चरके नेपालगन्जमे पत्रकार सम्मेलन मार्फत जानकारी कराइल हो । संघके केन्द्रीय सदस्य शेखर दहित इहे माघ २० गतेसे २२ गतेसम राप्तीसोनारी गाउँपालिका–६ सिधन्वामे आयोजना हुइना बटैलै । सम्मेलनमे थारु भाषा, साहित्य, कला, संस्कृति, परम्परा लगायतके विषयमे छलफल ओ बहस हुइना जनाइल बा ।
सम्मेलनमे आइल पाहुनाहुक्रनहे राप्तीसोनारी ओ नरैनापुरमे रहल पर्यटकीय क्षेत्र बर्फानीबाबा, सन्तानेश्वर, भुवरभवानी, सिक्टा नहर मूल बाँध क्षेत्रके अवलोकन करैना कार्यक्रम रहल स्थानीय आयोजक थारु गोचाली समाज नेपाली राप्तीसोनारीके महासचिव कालुराम समर्पण जानकारी डेलै ।
इहीसे आघे ०७३ सालमे पहिल राष्ट्रिय थारु साहित्य सम्मेलन दाङमे हुइल रहे । डुसरा कैलालीके पटेला, टिसरा बर्दियाके बढैयातालमे, चौठा रुपन्देहीके मुर्गीया, पाँचौं सुर्खेतके नयाँगाउँ, छैठौं कञ्चनपुर ओ सातौं बाँकेमे हुइ लागल हो ।