२० माघ २०७९, शुक्रबार February 3, 2023

थारु संस्कृति बचाइलाग एकजुट

८ माघ २०७९, आईतवार
थारु संस्कृति बचाइलाग एकजुट

सागर कुस्मी
धनगढी। थारु भासा, साहित्य, कला ओ संस्कृति संरक्षणमे बडेहाँबासी एकजुट हुइल बटैं ।

थारु समुदायमे रहल कला संस्कृतिहे अइना लावा पुस्टनमे हस्तान्तरण करक लाग कैलालीक गोदाबरी नगरपालिका ६ बडेहाँ गाउँक् थारु समुदाय संस्कृति संरक्षणमे जुटल हुइँट ।

अपन गाउँ ठाउँमे पुर्खौंसे डेखैटी आइल लोकसंस्कृति सखिया नाच, झुमरा नाच, मघौटा नाच, रटनचुवा नाच, दिन नचुवा नाच लगायत मेरमेराइक गीतबाँंस फेन माघ मिलन कार्यक्रम कैके डेखैले बटैं ।

कैलालीक् गोदाबरी नगरपालिका ६ नम्बर वडा फेन एक थारुनके घना बस्ती रहल ठाउँ हो । जहाँ थारु समुदायके अपन छुट्टे कला, संस्कृति ओ पहिचान बा । इ आधुनिक जबानाके थारु लोक कला, लोक संस्कृति लोप हुइटी गैल ओर्से इहिहे बचाइक लाग इ अभियान चलाइल गाउँ भलमन्सा पशुपती चौधरी बटैलैं ।

भलमन्सा कलैं कि, ‘हम्रे थारु गीतबाँस जबसे जानेजुकुर हुइली टबसे कर्टी आइल बटि । हमारठन हरेक मेराइक चालचलन बा । समय अन्सार खानपिन बा । महिना अन्सार टरटिहुवार बा । इहि बचैना हमार दायित्व ओ कर्तव्य फेन हो ।’

‘हमार संस्कृति हम्रे पुर्खा लोक नैबचाब कलेसे काल्ह जाके हमार लर्कापर्का सक्कु बिस्रा जैही ओहेमारे इ चिजहे जोगाके ढर्ही पर्ना बेला आइल बा’ उहाँ कलैं, ‘ओहे ओर्से हम्रे इ मेरके नाचगान डेखैटी जाब ओ अइना लावा पुस्टा सिख्टी जैही ओ भविस्यमे कर्टी जैही कना आस बा ।’

थारु समुदायके बर्का टिहुवारके रुपमे मान्जैना माघ टिहुवारके मौका छोपके माघ मिलन कार्यक्रम हुइल रहे । जहाँ बर्का पहुना गोदाबरी नगरपालिका वडा नम्बर ६ के वडा अध्यक्ष जग्गुराम चौधरी रहिंट । उहाँ थारु समुदायके सक्कु संस्कृतिहे पुस्टा हस्तान्तरण कर्टी गैलेसे किल थारु संस्कृति बछे सेक्ना बटैलैं ।

उहाँ कलैं कि, ‘हमार समुदायके संस्कृति बचैना हो कलेसे पहिले सुरुवात पुर्खनसे सुरु करे परठ । टबजाके हमार लर्का हेरहि, बुझहि ओ अपन जीवनमे उटर्टी जैहि ।’

लावा पुस्टा ओइने फेन पुर्खनसे गीतबाँस सिखे पर्ना उहाँ सुझाब फेन डेलैं । ‘हमार भासा, साहित्य, संस्कृतिहे मौखिक किल नाही लिखित रुपमे संरक्षण करे पर्ना बा । उहाँ कलैं, ‘हेरैटी रहल बर्किमार, ढुमरु, माँगर, सजना, सखिया गीत, अस्टिम्की गीत, लोककथा लगायत सक्कु चिजहे बचाइ पर्ना जरुरी बा ।’

इ कार्यक्रममे बडेहाँके बुद्धिजीवी राम प्रसाद चौधरी फेन हाजिर रहिंट । उहाँ कलैं, हमार थारु समुदायके टरटिहुवार, परम्परा, कला ओ संस्कृतिहे परिस्कृत कैके आघे बर्हे सेक्जाइ । ओहेमारे आब सक्कु जाने समाजिक विकासके लाग चिन्तनशिल हुइ पर्ना बटैलैं ।

ओस्टेके ६ नम्बरके वडा सदस्य कल्पना चौधरी पुरान संस्कृति सिखक लाग पुर्खनसे सिखे पर्ना बटैलैं । उहाँ कलैं, ‘हमार समाज कला संस्कृतिमे बहुत धनी बा मने संस्कृति लोप हुइटी गैल ओर्से थारु समुदायके ढेर संस्कृति फेन लोप हुइटी रहल बा ।’

इ कार्यक्रम बडेहाँ गाउँक् शैलेश्वरी माध्यमिक विद्यालयके अंगनामे हुइल रहे । जहाँ ओहे गाउँक् ढक्नाहान पुर्वाके मघौटा नाच, पस्छिउँ पुर्वाके मघौटा नाच, कुट्टी पुर्वाके मघौटा नाच, झरबरान पुर्वाके दिन नचुवा नाच, भुइँह्यारा गाउँक् हुरडुंगुवा नाच, ओ गाउँक् लौंडिनके मेरमेराइक नाच फेन कार्यक्रमहे ढिकैले रहे ।

माघ मिलन कार्यक्रममे गायक राजु चौधरी राज, मोडेलमे आइसा चौधरी, बिक्रम चौधरी, सोनु चौधरी, हाँसी लगुइया, सुर्दिन अक्किलकट्ला, साहित्यकार सुमित रत्गैंयाँंसे कार्यक्रम बहुट चैनार हुइल रहे कलेसे मन्डरिया टेक भगोरिया, रामु पछलडंग्याके मन्डरक खोटसे दर्शक ओइनके मन खिच्ले रहे ।

माहोल चम्पन कराइक लाग, सन्तोष सिंह, दिपक कडायत, रितु कोली, जगतराम चौधरी लगायत बहुत बुद्धिजीवी ओइने सैगर सहभागीता जनैले रहिंट ।

बुद्धिजीवी कर्णबहादुर चौधरी सम्ह्रौटी गीतसे कार्यक्रमके घुर्घुट उघारगैल रहे । कार्यक्रमके घरगोसिया भलमन्सा पशुपती चौधरी रहिंट कलेसे कार्यक्रम सहजीकरण कैना जिम्मा साहित्यकार संगत कैलरिया पैले रहिंट । उ कार्यक्रमसे प्रभावित होके आबसे हरेक साल संस्कृति बचाउ कार्यक्रम कैना ओ हरेक टिहुवारमे सांस्कृतिक जागरण कार्यक्रम कैना टेक भगोरिया जनैलैं ।