धनगढी, १६ पुस । कैलाली जिल्लाके कैलाली गाउँपालिका अन्र्तगत ९ वडामे जारी रहल निशुल्क आँखी उपचार शिविरमे चार ठाउँ हुइल शिविरमे १ हजार १२७ जाने सेवा लेले बटै ।
च्यारिटी हेल्थ फाउण्डेशन ओ धनगढी नेत्रालय प्रा.लि. के प्राविधिक सहयोग ओ कैलारी गाउँपालिकाके आयोजना तथा सहकार्य ओ व्यवस्थापनमे कैलारी गाउँपालिकाके सक्कु वडामे यिहे पुस ११ गतेसे पालिक–पाला आँखी सम्बन्धी रोगके निःशुल्क स्वास्थ्य शिबिर सञ्चालन हुइटी रहल कैलारी गाउँपालिकाके स्वास्थ्य संयोजक नरेशकुमार चौधरी जानकारी डेलै ।
निशुल्क आँखी शिविर हसुलिया स्वास्थ्य चौकी, वार्ड नं ३ मे पुस ११ गते, के–गाउँ आधारभूत स्वास्थ्य केन्द्रमे उ शिविर हुइल रहे । ओम्ने २०२ जाने नाउँ दर्ता करके चेकजाँच करलमे २९ जाने अप्रेसनके लाग सिफारिस ओ ५४ जनहनहे चश्मा डेहल बा ।
वडा नं ४ मे पुस १३ गते हुइल शिविरमे २६८ जाने नाउँ दर्ता करलमे ४६ जानेक अप्रेसनके लाग सिफारिस हुइल ओ ८५ जनहनहे चस्मा डेहल बा ।

पवेरा स्वास्थ्य चौकी, बडा नं ५ मे पुस १४ गते हुइल शिविरमे ३२१ जाने नाउँ दर्ता करलमे ४२ जनहनके अप्रेसनके लागि सिफारिस ओ ९३ जनहनहे चस्मा डेहल बा । ओस्टेक कैलारी गाउँपालिकाके सभाहल वडा नं १, हसुलियामे १५ गते संचालन हुइल शिविरमे ३३६ जाने नाउँ दर्ता करलमे ६७ जानेक अप्रेसन ओ ९८ जनहनहे चस्मा डेहल बा ।
शिबिरमे आँखी सम्बन्धी रोगके चेकजाँच, उपचार ओ औषधि उपलब्ध करैना, परिक्षणके कममे छनौट हुइल मोतिबिन्दु, आँखीक पल्का विल्गटल समस्याके अप्रेशन तथा आँखीम मासु पलाइल रोगीके धनगढी नेत्रालयसम एकतर्फी यातायात सुविधा सहित निःशुल्क अप्रेशन सेवा साथे आवश्यकता अनुसार लग्गे लेखपढ कैना चस्माफे उपलब्ध करैना जनागिल बा ।

ओस्टेक करके बसौटी स्वास्थ्य चौकी, बडा नं २ मे १६ गते, रतनपुर स्वास्थ्य चौकी, वडा नं ७ मे १७ गते, बनकट्टा आधारभुत स्वास्थ्य केन्द्र, वार्ड नं ६ मे १८ गते, गदरिया स्वास्थ्य चौकी, वार्ड नं ९ मे २० गते ओ उदासिपुर प्राथमिक स्वास्थ्य केन्द्र, वडा नं ८ मे २१ गते निशुल्क आँखी जाँच शिविर संचालन हुइना बा ।
आँखी जाँच शिबिरमे नाम दर्ता वापत रु २५ शुल्क लग्ना बा । उ नाम दर्ता बापत उठल रकम च्यारिटी हेल्थ फाउण्डेसनसे सञ्चालित निःशुल्क सव वाहन सल्बालनार्थ कोषमे सहयोग स्वरुप प्रदान कैना जनागिल बा ।