कञ्चनपुर, १३ पुस । नेकपा माओवादी केन्द्रके अध्यक्ष पुष्प कमल दाहाल(प्रचण्ड) वर्तमान काँग्रेस–एमाले नेतृत्वके सरकार सुशासनके पक्षमे नैरहल बटैले बाटै ।
शनिच्चरके कञ्चनपुरके पुनर्वासमे माओवादी केन्द्रसे आयोजना करल भ्रष्टाचार बिरुद्धके खबरदारी सभा सम्बोधन कैटी सरकार सुशासनके पक्षमे नैरहल बटाइल हुइट ।
‘इ सरकार सुशासनके पक्षमे नैहो, आपन भ्रष्टाचारी मनैनहे बचैना उद्यत बा, ‘प्रचण्ड कहलै, ‘विचौैलियाके पक्षमे किल काम करटी रहल बा, जनता सरकारप्रति निरास बाटै ।’
प्रचण्ड माओवादी नेतृत्वके सरकार सुशासन ओ भ्रष्टाचार बिरुद्धमे गतिबिधी आघे बह्रलपाछे अँट्याके सरकार ढलैना केन्द्रीत रहल बटैलै । ‘मोर नेतृत्वके सरकार राष्ट्रिय रुपमे भ्रष्टाचार बिरुद्धके अभियान संचालन करल रहे, उहाँ कहलै, ‘दलके बरवार नेता एव बरवार कर्मचारी परलपाछे सरकार ढलागैल ।’
माओवादीसे आघे सारल सुशासनके अभियान संचालन करल डेखके विचौलिया अँट्याइल बटैलै ।
पुर्व प्रधानमन्त्री समेत रहल प्रचण्ड अपने चीन, भारतमे भ्रमण करेबर नेपालके हितके क्षेत्रमे काम करल बटैटी उहाँ नेपाल भारत ओ चीनसंग विद्युत ब्यापार सम्झौता ऐतिहासिक हुइल बटैलै ।
अपने भारतीय प्रधानमन्त्री नरेन्द्र मोतीसंग कञ्चनपुर सहित दार्चुलाके लिपुलेकसम सीमा समस्याबारे स्पष्ट बात राखल बटैलै ।
प्रचण्ड अपने तीनचो सरकारके नेतृत्व करेबर सुप प्रदेशमे गौरबके आयोजना संचालन करल बटैलै । उहाँ दोधाराचाँदनी सुक्खा बन्दरगाह निर्माण, सुप विश्वविद्यालय निर्माण, गेटा अस्पताल, गोकुलेश्वर कृषि क्याम्पस, धनगढी क्रिकेट फापला मैदान निर्माण सहितके योजना आघे बह्रल बटैलै ।
प्रचण्ड माओवादी केन्द्र सरकारके नेतृत्व लेके थप भ्रष्टाचार बिरुद्धमे अभियान आघे बह्रैना बटैलै ।
माओवादीले सरकारके नेतृत्व कैके गिरीबन्धु, वाईडबडी, ओ्म्नी सक्कु भ्रष्टाचार काण्डके फाईल खोल्ना बटैलै । वर्तमान सरकार भ्रष्टाचारमे लिप्त हुइल ओरसे देशभर माओवादीप्रति जनलहर बह्रल बटैलै । प्रचण्ड आगामी ०८४ के निर्वाचनमे माओवादी एक नम्बर पार्टी बन्ना समेत घोषणा करले बाटै ।