धनगढी, २१ कात्तिक । धनगढी उप–महानगरपालिका ओ कैलाली उद्योग वाणिज्य संघ बिच सम्झौता हुइल बा ।
आगामी दिनमे आर्थिक, सामाजिक, रोजगारी, पर्यटन लगायतके क्षेत्रहमे आपसी समन्वय ओ सहकार्य कैटी काम कैना मेरके समझदारी पत्रमे हस्ताक्षर करल हो । शुकके रोज धनगढी उपमहानगरपालिकामे आयोजित एक विशेष कार्यक्रमके बिच समझदारीपत्रमे हस्ताक्षर करल हो ।

धनगढी उपमहानगरपालिकाके नगर प्रमुख गोपाल हमाल ओ कैलाली उद्योग वाणिज्य संघके अध्यक्ष पुस्करराज ओझा समझदारी पत्रमे हस्ताक्षर करल हुइट । समझदारीपाछे डुनु संस्थासे क्षेत्रीय आर्थिक विकास, उद्यम प्रवद्र्धन, लगानी आकर्षण, स्थानीय उत्पादनके प्रवद्र्धन ओ रोजगारी सिर्जनाके लाग सहकार्य कैना प्रतिबद्धता जनैले बटै ।

कार्यक्रममे डुनु संस्थाके पदाधिकारी, उद्यमी, व्यापारी तथा सरोकारवाला निकायके प्रतिनिधिहुक्रनके उपस्थिति रहल रहे । धनगढी उप–महानगरपालिका ओ उद्योग वाणिज्य संघ, कैलालीके यी साझेदारी स्थानीय विकासके लावा मोडके रूपमे हेरल बा ।