धनगढी, १७ कात्तिक । अइना अगहन २२ गतेसे सुदूरपश्चिम महोत्सव २०८२ सञ्चालन हुइना हुइल बा ।
कैलाली उद्योग वाणिज्य संघसे अँट्वारके धनगढीमे पत्रकार सम्मेलन मार्फत महोत्सवके १९औं संस्करणबारे जानकारी डेहल हो । संघके अध्यक्ष पुष्कर राज ओझाके अनुसार सुदूरपश्चिमके कला, संस्कृति, परम्परा, खानपान ओ कृषिके प्रवद्र्धन कैनाके साथे व्यापारिक गतिविधि विस्तार कैना महोत्सवके उद्देश्य रहल बा । उहाँ महोत्सवसे स्थानीय उत्पादन, हस्तकला, कृषि उपज, उद्यमशीलता ओ पर्यटन प्रवद्र्धनमे समेत टेवा पुग्ना बटैलै ।
अध्यक्ष ओझाके अनुसार यी बरस महोत्सवमे स्थानीय कलाकारके सांस्कृतिक प्रस्तुति, कृषि तथा उद्योग प्रदर्शनी, महिला तथा युवाका उद्यम स्टल, विविध प्रतियोगिता ओ मनोरञ्जनात्मक कार्यक्रम रहना बावै । साथे बालबालिकाके लाग खेलकुद क्षेत्र, कृषि प्रविधि प्रदर्शन ओ घरेलु उत्पादनके बिक्री समेत हुइना जनाइल बा ।
“समृद्ध सुदुरपस्चिमके लाग आर्थिक समृद्धि” कना मूल नाराके साथ आयोजना हुइना महोत्सवके लागत ३ करोड अनुमान करल बा । कलेसे सात लाख व्यक्तिसे अवलोकनके अपेक्षा कैटी १५ करोड बराबरके आर्थिक करोवार हुइना अध्यक्ष ओझा अनुमान करल बटैलै ।
महोत्सव धनगढी उपमहानगरपालिका १ पशुपति टोलमे सञ्चालन हुइना बा । महोत्सवमे सुदूरपश्चिमके सात जिल्लाके व्यापारी, उद्योगी, कृषक तथा सांस्कृतिक समूहके सहभागिता रहना जनाइल बा । महोत्सवसे प्रदेशके आर्थिक, सामाजिक ओ सांस्कृतिक एकता सुदृढ कैना मद्दत पुगैना विश्वास लेहल बा ।
महोत्सवमे पाँचसय स्टल रहना जनाइल बा । ओम्नेसे कृषिके लाग ४० ठो निःशुल्क स्टल, महिला उद्यमी, एकल महिला स्थानीय परिकारके लाग १५ स्टल रहना जनाइल बा ।
महोत्सव अवलोकनके लाग विद्यार्थी, खेलाडीहे ५० रुप्या टिकट दर निर्धारण करल बा कलेसे सर्वसाधरणके लाग एकसय रुप्या ओ जेष्ठ नागरिक, फरक क्षमता रहल व्यक्तिके लाग प्रवेश निःशुल्क रहना जनाइल बा । ओस्टके संघमे दर्ता होके नियमानुसार नविकरण हुइल व्यवसायी सदस्यहे सदस्यता पत्र डेखाके निःशुल्क प्रवेश पैना रहल बा ।