धनगढी, २३ कात्तिक । यात्रुबाट पैसा असुल्ने अटो चालकलाई प्रहरीले पक्राउ गरेको छ ।
गौरीफन्टा नाकाबाट आइरहेको व्यक्तिबाट भन्सारमा नेपाली सुरक्षाकर्मीलाई दिनुपर्छ भनि पैसा असुल्ने अटो चालकलाई प्रहरीले पक्राउ गरेको हो । गौरीफन्टा नाकाबाट नेपाल आउँदै गरेका गोदावरी नगरपालिका–२ अत्तरियाका २७ वर्षीय लोकेन्द्र ओझाबाट दुई हजार भारु रुपिया असुलेका थिए ।
पक्राउ पर्नेमा धनगढी उपमहानगरपालिका–३ मिलन चौक बस्ने २८ वर्षीय अटो चालक मानबहादुर बयाडी र वडा नम्बर २ चौराहा बस्ने ३१ वर्षका करन बोहरा रहेका छन् ।
यात्रुबाट पैसा असुलेर नेपाली सुरक्षाकर्मीलाई बद्नाम गर्ने कार्य गरेकोले दुवै अटो चालकलाई सुरक्षा चौकी त्रिनगरबाट खटेको प्रहरीले नियन्त्रणमा लिएको जिल्ला प्रहरी कार्यालयका प्रवक्ता एवम् प्रहरी नायब उपरीक्षक कवीन्द्रसिंह बोहराले बताए ।
उनले अटो चालकले असुलेको पैसा पनि सम्बन्धितलाई फिर्ता गराइएको जानकारी दिए । दुवै अटो चालकमाथि आवश्यक कारबाहीको प्रक्रिया अगाडि बढाइएको जिल्ला प्रहरी कार्यालय कैलालीले जानकारी दिएको छ ।