धनगढी, ९ अगहन । इहे अगहन २२ गतेसे धनगढीमे हुइना सुदूरपश्चिम महोत्सवके तयारी सुरु करल बा ।
शुकके रोज पत्रकार सम्मेलन मार्फत महोत्सव आयोजना तथा तयारी बारे जानकारी कराइल हो । कैलाली उद्योग वाणिज्य संघसे आयोजित सुदूरपश्चिम महोत्सवके १७औं संस्करण हो । विगत १६ बरससे प्रदेशके कृषि, पर्यटन, उद्योग, व्यवसाय तथा व्यापार प्रबद्र्धनके लाग महोत्सव आयोजना हुइटी आइल बा ।
‘समृद्ध सुदूरपश्चिमके लाग आर्थिक समृद्धि’ कना मूल नाराके साथ हरेक बरस अगहन २२ से पुस २ गतेसम महोत्सव आयोजना हुइटी आइल बा ।
सुदूरपश्चिमके औद्योगिक, व्यापार, कृषि तथा पर्यटन मेलाके रूपमे मनाजैना महोत्सवमे कृषि उत्पादन, मह, जडीबुटी, हस्तकला, अल्लोका सामग्री, अलैंची, अदुवा, मसला, फर्निचर, अटोमोबाइल, गार्मेन्ट, इलोक्ट्रोनिक, होटल, सूचना प्रविधिलगायत व्यापारिक, रमाइलो मेला तथा बाल उद्यान सहितका ४ सयसे ढिउर स्टल रहना जनाइल बा ।
महोत्सव आयोजनामे अनुमानित २ करोड खर्च हुइना ओ १० करोड बराबरके करोबार हुइना कैलाली उद्योग वाणिज्य संघके अध्यक्ष पुष्पराज कुँवर जानकारी डेलै । ओस्टके उहाँ महोत्सव अवधिभर करिब ५ लाख व्यक्तिनसे अवलोकन करजैना अपेक्षा लेहल फेन बटैलै ।
महोत्सव अवलोकनके लाग विद्यार्थीनके लाग रु. ५० टिकटदर राखल बा कलेसे सर्वसाधारणके लाग रु.१०० ओ फरक क्षमता रहल व्यक्तिके लाग निःशुल्क रहना जनाइल बा ।